Shillong, Rymphang, 01: Ka jingïai thep kyrteng jong ki kyrtong ki ban ïakhun ïa ka elekshon MDC sha ka Iingdorbar Thawain jong ka Khasi Hills Autonomous District Council (KHADC) ka ban sa long ha ka 21 tarik mynta u bnai ka dang bteng haduh mynta.
Ki la don haduh 10 ngut ki kyrtong na ki seng sain pyrthei bapher bapher kiba la thep kyrteng ha ka Sngi Saitjaiñ ban ïakhun ïa kane ka elekshon MDC
Kine ki 10 ngut ki kyrtong ki long u kyrtong ka seng Congress na Mawsynram u Bah Batskhem Marbaniang, u kyrtong ka UDP na Mawsynram u Bah Sully Lyngdoh, u Sitting MDC ka Mawsynram u Bah Alvin Sawkmie, u kyrtong ka seng Congress na Mawphlang-Diengiei Constitency u Bah George Sun, ka kyrtong ka BJP na Mawlai Constituency ka Kong Daniella Nonglait, u kyrtong ka BJP na Malki-Laitumkhrah Constiteuncy Bah Kynsaibor Lyngdoh, u kyrtong ka BJP na Nongthymmai Constiteuncy u Bah Fairlock D. Ryngksai, u kyrtong jong ka Khun Hynniewtrep National Awakening Movement na Mawhati Constituency u Bah Aiban Nongsiej, u kyrtong ka Hill State Peoples Democratic Party na Mawkyrwat Constituency u Bah Poland Sohphoh bad u Sitting MDC ka Mawkyrwat Constituency u Bah Poland Sohphoh.
Ha rilum Jaintia ruh ngi la sakhi ba ka jingïai thep kyrteng jong ki kyrtong ki ban ïakhun ïa ka elekshon MDC sha ka ingdorbar thawain jong ka Jaintia Hills Autonomous District Council ka ban sa long ha ka 21 tarik Rymphang, 2025 ka dang bteng haduh mynta.
Lai ngut ki kyrtong ki ban ïakhun ïa ka elekshon MDC ki la thep kyrteng ha kane ka sngi ha ophis jong u Deputy Commisisoner ka West Jaintia Hills District. Kine kyrtong kiba la thep kyrteng ha kane ka sngi ki kynthup ïa u kyrtong ka BJP na Jowai South u Bah Heimonmiter Phawa, u Khroo Lamsalanki Pariat kum u kyrtong Shimet na Jowai North bad kiwei kiwei.
Katba lai ngut ki kyrtong ka United Democratic Party kiba la thep kyrteng ha ophis SDO Amlarem ryngkat ka jingsynran lang jong u MLA ka UDP u Bah Lahkmen Rymbui ki kynthup ïa u Bah Medling Swer na War East Constituency, u Bah Kat Massar na War Central Constituency bad u Bah Shlur Lamin na War West Constituency.
