Shillong, Jymmang, 15: Ka Iingbishar Meghalaya High Court ha ka sngi Palei ka la bthah ïa ka Srokar Jylla ban pyndep noh mardor ïa ka jingaiti ïa ka jaka sha ka Airports Authority of India (AAI) na ka bynta ka jingshna pynheh ïa ka Shillong Airport, hapoh ar bnai.
Hadien ba la shong bishar ïa ka PIL ka Bench ba kynthup ïa u Chief Justice IP Mukerji bad u Justice W Diengdoh ha ka hukum ki la ong, ““Ngi shu peit bad bthah ba ki kyndon ba dei ban ban bud ki dei ki jingsngew jong ka sorkar jylla. Kaei kaba ka ïingbishar ka bthah ka long hadien ba la pyndep ïa baroh ki kyndon, ïa ka jaka dei ban aiti noh da ka jylla sha ki bor pynïaid kad liengsuiñ ym palat ïa ka ar bnai.”
Hynrei ka la ong, “lada don kano kano ka jingkhanglad ne jingeh ban kohnguh ïa kane ka jingbthah, ka jylla kan ai ïa ka jingpyntip sha kane ka iingbishar da kaba aplikeshon hapoh ar bnai. Lada donkam, ngin thung ïa u Ophisar ba kyrpang ne u Commissioner ban pyntreikam ïa ka jingthied jaka na ki trai jaka da ka jylla, ban aiti sha ki bor pynïaid ka kad liengsuiñ.”
Ha ka jingbishar, u Additional Advocate General u la ai jingmut da ka jingsngewskhem bad jingkitkhlieh ban batai balei ba haduh kane ka sngi ym shym la shim da ka jylla ïa ka jaka ba donkam ban pynsuk ïa kane ka projek. U la pyntip ba la sdang ïa ka jingshim jaka bad ong, “la ap ïa ka jingmynjur jong ka Kynhun Myntri bad ka lah ban urlong noh shen.”
U Deputy Solicitor General u la pyntip sha ka Iingbishar ba ki briew na ka ophis jong u Director General of Civil Aviation (DGCA) ki la pynlong ïa ki jingïalang bad ki bor pynïaid ka Shillong Aiport ha kaba ïadei bad ki katto katne ki kam. Ha ka jingïalang, la paw ba ki don katto katne ki jingkhanglad ha ka lynti ïaid liengsuiñ sha ka kad liengsuin kiba la donkam ban weng noh da ka jylla.
Katkum kane, ka Bench ka la bthah ïa ka Sorkar Jylla ban pynlong ïa ka jingïamir jingmut bad ka DGCA bad ban leh ïa kaba donkam hapoh katei ka por ba la kdew kaba ar bnai.
“Ha kane ka por, ka Sorkar Pdeng kan ïaid shakhmat bad ka jingkhot tender ban tei ne pynthymmai ïa ki jingtei jong ka kad liengsuin ban pynsuk ïa ka projek ba la kdew haneng khnang ba mar mar ynda la dep ïa ka jingïoh ïa ka jaka, ka kam ka lah ban sdang,” la ong ha ka hukum.
Shuh shuh, ka Bench ka la bthah ruh ïa ka Sorkar Jylla bad ïa ka Sorkar Pdeng ban aiti ïa la ki jong ki jong ki kaiphod ba la pyndep ha ka 15 tarik, Naitung.
“Ngi pynpaw ïa ka jingkyrmen bad ïa ka jingangnud ba ha ka 15 tarik, Naitung, 2025 kane ka projek kaba ïadei bad ka kad Shillong Airport ka dei ban tyllun noh shakhmat,” la bynrap shuh shuh ka hukum.
