Shillong, Naitung, 15: Ka Ïingbishar Meghalaya High Court ha ka sngi Baar ka la bthah ïa ka Ministry of Defence, ïa ka Sorkar Jylla, ïa ka Airport Authority of India bad ïa u Director General jong ka Civil Aviation ba kin shimkhia ïa ki sienjam ban pynkloi ïa ka projek ba pynheh ïa ka kad liengsuiñ Shillong kaba don ha ka shnong Umroi, Ri Bhoi District.
Kane ka jingbthah ka la wan hadien ba ladep bishar bniah ïa ka kaiphod ba la aiti da ka AAI.
Ha ka hukum ba la pynmih hadien ba la shong bishar ïa ka PIL halor kane ka mat, ka Division Bench kaba kynthup ïa u Chief Justice IP Mukerji bad u Justice W Diengdoh ka la ong, “haba bishar bniah ïa kane ka kaiphod, ngi lap ba mynta tang ki kam ba kongsan ha madan kiba la donkam ban leh na ka bynta ban pynheh ïa ka kad liengsuiñ Shillong. Naduh mynta, donkam ban pynstet ïa ka kam kaba lah ban pynlong ïa ka projek kaba treikam ha ki por ban sa wan.”
“Kumta, dei ban shim ïa ki sienjam kiba kyrkieh da baroh ki bor ba dei peit kiba kynthup ïa ka Ministry of Defence, ka Sorkar Jylla, ka Airports Authority of India bad u Director General ka Civil Aviation khnang ban pynurlong noh mardor na ka bynta ka jingtreikam jong ka projek,” ka la bthah ka hukum.
Ka Bench ka la bthah ruh ba ïa ka jingthoh ba la pynkhreh da ka Sorkar Jylla halor kane ka projek dei ban pynrung ha ka Affidavit ban shim smai da u ophisar ba tbit jong ka Jylla bad ban aiti ha ka Ïingbishar hapoh ka 18 tarik, Naitung. Ha ka jingpeit bniah ïa ka jingthoh ba la kdew, ka Ïingbishar ka la lap ba donkam ïa ka jaka kaba heh 22 akar na ka bynta ka projek, ha kaba 10.30 akar dei ban ïoh na ki bor jong ka tnat Defence. Ka Sorkar Jylla ka la mynjur ban thied ïa ka jaka kaba heh sa 11.75 akar ha ka dor T. 72,17,56,237 lyngba ka jingïateh kular bad ki trai jaka. La khmih lynti ba ïa kane ka jaka yn sa ïoh shimti ha u bnai Naitung, mynta u snem. Ka Ministry of Defence ka la ai jingbit ïa ka jylla ban trei ïa ka jaka shipai kaba heh 10.30 akar ha Umroi Military Station, Shillong halor ka jingïateh hapdeng jong ka bad ka Jylla na ka bynta ban aiti ïa ka jaka kaba ïaryngkat dor da ka Jylla sha ka Ministry.
Katkum ka Draft Master Plan, ïa ka surok pynher liengsuiñ 4 (RWY 4) yn pynheh da 571 mitar kaba shim ïa ka jingjrong baroh kawei sha ka 2400 mitar. Ynda ladep kane ka jingpynheh ïa ka RWY 4, ka jinghiar jong ki liengsuiñ kan long na ka jaka hiar liengsuiñ 22 (RWY 22 ) bad ka jingkiew jong ki na ka RWY 4.
Ha kane ka jingbishar, u Deputy Solicitor General jong ka Ri India u Dr Mozika u la aiti ba ïa ka Tender na ka bynta ka jingtei, jingpynthymmai bad jingpynkylla ïa ki jingtei jong ka kad liengsuiñ ba la aiti da ka Airports Authority of India sha u kontraktor mar ïa ïoh ïa ka jaka na ka Sorkar Jylla bad ka tnat Defence bad tang shu ïoh ki jingdonkam halor ka Environmental Clearance.
U Dr Mozika u la ai jingmut ruh ba ka Airports Authority of India ruh kan hap ban weng noh ïa ki katto katne ki jingkhanglad ïa ka jingtreikam ki liengsuiñ kiba mih na ka jingdon ki lum, ki dieng bad kiwei kiwei ha ka lynti ïaid liengsuiñ sha ka kad liengsuiñ.
Ka ïingbishar ka la buh sngi ban shong bishar biang ïa kane ka kam ha ka 12 tarik, Nailar, 2025, ban khmih bniah biang ïa ka jingpyntyllun ïa ki kam.
