Shillong, Nailar 14: Ka Iingbishar Meghalaya High Court ka la bthah ïa ka Shillong Municipal Board (SMB) ban aiti ka kaiphod halor ka jingdon kiba die madan ha surok kynthup ïa ki bym don ki laisen ha ka thaiñ Laitumkhrah.
Ka Ïingbishar ka la pynmih ïa kane ka hukum haba jubab ïa ka aplikeshon ba la ujor da ka Seng Samla Laitumkhrah “Ieng Skhem Ha Ka Hok,” ka society ba la register, ban long mamla hapoh ka Public Interest Litigation (PIL).
“Ngi la bthah ïa ka Shillong Municipal Board ban ai ka kaiphod sha ka Ïingbishar halor ka jingdon ki laisen ba la sam halor ïa kiba die madan ryngkat bad ki kyrteng jong ki briew na ka thaiñ Laitumkhrah,” ong ka Division Bench ha ka hukum kaba kynthup ïa u Chief Justice IP Mukerji bad u Justice W Diengdoh ba la pynmih ha ka sngi Palei.
“Ïa ka Board la bthah ruh kumjuh ban leit jurip, kan tohkit ban ïathuh hapoh ka kaiphod ïa ki kyrteng bad ki jingdon ki nongdie madan kiba die ïa ki mar khlem ki laisen ha ka thaiñ. Ïa kane ka kaiphod dei ban aiti sha ka Court ha ka 28 tarik, Nailar, 2025,” ka la bynrap.
Ka Seng Samla Laitumkhrah ka la pynpaw ruh ïa ka jingsngewkhia kaba khraw halor ka jingdon jong ki nongdie madan ba khlem ïoh bor ha Laitumkhrah, Shillong.
Kine ki hukum da ka Ïingkashari ki long ban pynkhuid ïa ki bynta jong ka nongbah na ka jingdon ki nongdie madan ba khlem laisen, kum ka Police Bazar ban bteng pat sha Laitumkhrah ban kyndang ïa kiba die madan na ki lynti ïaid kjat, na ki surok khnang ban pynkylluid bad ban pynlong ïa ki lynti ïaid kjat kiba kylluid kumjuh ki surok.
Hynrei ïa kane ka kam la pyrshah da ka Meghalaya and Greater Shillong Progressive Hawkers and Street Vendors Association (MGSPHSVA) bad Advocate na ka jylla halor ka nongrim ba ka don ïa ka PIL kaba ladep shim kam halor kane ka jingeh ha baroh ki kam jong ka Shillong. Kane ka jingbishar ka kynthup ha baroh kawei ka nongbah Shillong.
Katkum u Additional Advocate General Tangi B. kane ka kam kaba la leh da ka State Agency ha Police Bazar kan dang ïaid shakhmat sha kiwei pat ki thaiñ.
