Shillong, Nailar 31: Ka Ïingbishar Meghalaya High Court ka la bthah ïa ka tnat Excise ka Sorkar Jylla ban bishar bad ban shim ïa ka rai halor ka jingtyrwa ban buh ïa ki dukan kiad ha ki shnong kiba don hajan ka surokbah hapoh ka saw taïew.
Kane ka jingbthah jong ka Iingbishar ka la wan ha ka jingjubab ïa ka Public Interest Litigation (PIL) ba la ujor da u Bah Arbiangkam Kharsohmat, u nongshong shnong ka Mawryngkneng, Pdengshnong, East Khasi Hills District.
Kane ka PIL ka la kynnoh ba ka Dorbar Shnong Pommura ka la pyrkhat ban ai ïa ka No-objection Certificate ban buh saw ne san tylli ki wine stores hapoh ka shnong, ha kaba la ong ba ka don marjan bad ka surokbah.
Ha kaba ïadei bad ka Hynñiewtrep National Youth Front (HNYF) ka la pynpaw ïa ka jingpyrshah halor kane ka jingthmu jong ka Dorbar Shnong da kaba pynpaw ïa ka jingsngewkhia naba kane kan lah ban ktah ïa ka koit ka khiah jong ki paidbah bad kumjuh ruh ïa ki jingshngaiñ jong ki.
U nongsaid aiñ jong u nongmudui u la ong ba ka jingai lad ban plie ïa ki dukan die kiad kan ktah ïa ka koit ka khiah jong ki nongshong shnong bad kan pynlong ruh ïa kane ka thaiñ kaba lah ban jia ki jingïatakhuh kali kaba manla ka por. Ki la ong ba kim kwah ban plie ne ban buh ïa ki wine stores nalor kiba la don lypa hapoh ka shnong.
Kane ka aplikeshon ban ai ïa ka licence ka sah hapoh ka jingpyrkhat hakhmat ka tnat ka tnat excise.
Ka Division Bench kaba kynthup ïa u Chief Justice IP Mukerji bad u Justice W Diengdoh ha ka hukum ba la pynmih ha ka sngi Saitjaiñ ka la phai sha ka jingbishar jong ka Supreme Court kaba la khang ban die ïa ka kiad ha shi lynter ki surok bah ka ri bad ki surokbah ka jylla.
Ha kawei ka liang ka Iingbishar ka la kdew ba kine ki jingbishar ki la shah ïa ki dukan kiad ba kin don ha jylla Meghalaya, hynrei kin hap ban bud ïa ki kyndon kiba la buh.
“Kane ka dei ka kam bad ka Sorkar ka dei ka kam kaba hap ban bishar bha. Ka dei ban bishar ïa ki jingtip kiba bniah halor ki application ha shwa ban ai ïa ki Certificate,” ka la ong.
Ha shwa ban pynwai noh ïa ka PIL, ka Division Bench ka la bthah, “kane ka writ petition dei ha kaba nyngkong ban phah shwa sha ka tnat Excise jong ka sorkar jylla ba kin shim bishar shwa da ka Pommura Dorbar Shnong ha kaba ïadei bad ka jingai ïa ka No objection Certificate.”
“Lada ka jubab ka ong haoid, ka Sorkar ka lah ban phah ïa ka Representation sha ka jingtyrwa sha u Officer kaba ym duna ïa ka kyrdan Secretary u ba lah ban bishar ïa kane ka kam bad ban shim ïa ka rai ha ki saw taïew la kin pynskhem ïa ka rai jong ka Pommura Dorbar Shnong lane ban pynthikna ba kum kine ki jingpynkylla thymmai ka long kaba bit bad kaba bha. Ïa kane ka rai kaba la wanrah yn sa phah sha u nongujor,” la ong ka Division Bench da kaba bynrap ba u Secretary un pyrkhat ïa kane aplikeshon ka ban ïaid lang katkum ki kyndon jong ka aiñ.
