Shillong, Nailar 01: U Secretary ka KHADC u la pynbna ïar ha baroh ki Elaka, ki Hima kiba hab hapoh u pud u sam ka KHADC ba katkum ba la ïohi ha ki lad pathai khubor ba ka don ka jingkhynra mynder ri hapoh ka jylla Assam kaba lah ban don ka jingrung beaiñ ki mynder ri lane ki phetwir ha ki Hima ne ki shnong bapher bapher jong ka Ri Khasi khamtam eh ha ki thaiñ khappud jong ka jylla Assam.
Halor kane, la bthah bad kyntu ïa baroh ki Hima ban ai hukum ïa ki Dorbar Shnong, Dorbar Raid bapher bapher ban long kiba husiar bad peitngor ïa ka jingwan rung beaiñ ki briew bym dei ki trai muluk ki trai jaka bad lada shem ïa kum kita dei ban shim khia bad report mardor sha ki briew jong ka aiñ ka sorkar jylla.
