Halor ka jingiakynad ha Bangladesh
Ka Khasi Students’ Union (KSU) ka la iohi ia ki jinglong jingman ha ka ri Bangladesh ha kaba ka synshar ka khadar ka pra phom bad ka ri ka la poi sha ka jingiakynad bym ithuh ithaw shuh. Ki para dkhot baroh ki la tip lut ba wat ka sorkar ka khyllem bad kane ka la wanrah biang ia ki jingsyier kumba jia ha u snem 1971.
Ha u snem 1971, ka jingiakynad ha Bangladesh, ka la pynlong ia ki nongshong shnong kane ka ri ban phetwir na la ka ri bad tur ruma kat sha ba lap. Ha kane ka jingjia mynshwa da ki lak ngut ki wan poiwir sha ki lum Khasi bad ioh jingiarap na ka sorkar ban seng shnong bad iing hapdeng jong ngi khlem ka jingbit ki paid Khasi. Kane ka jingwan ki khar bangla, ka pynshong syier ia ki rit paid Khasi ha la ka Bri U Hynñiewtrep naduh u snem 1971 haduh mynta kaba poi sha ki jingiakynad, ki jingmynsaw bad jingpyniap na ka por sha ka por namar kine ki khar bangla ki kwah ban pynkylla ri bengali ia ka Ri Khasi.
Balei ka KSU ka hap ban ia khih? Balei ki paid Khasi ki shah kem shah pyniap shah knieh ka khaii shah knieh ka khyndew ka shyiap? Ka daw ka dei namar kine ki poiwir ba wan naduh u snem 1971.
Mynta ka thma ha Bangladesh ka la khie biang. Ki paid Bangladesh hapdeng ka thma pohiing kin ia kulmar para ma ki bad kane ka wanrah ia ka jingphet wir ia ki phew lak ngut ki jait jong ki. Nuksa wat ka PM ka Bangladesh ka la wan phet sha India. Kan eh aiu ba ki paidbah ka Bangladesh ban wan phet sha Meghalaya.
Ka Jaidbynriew kam shym poi pyrkhat ba kaei kaba jia ha u 1971 kan pynjaw snam, pyniap briew haduh katne katne ha la ka Ri Khasi. Kumta to phikir ba ha u snem 2024, ka KSU kan long kata ka nongpeit pyrman (sentinel) ha man la ki shnong ki thaw khamtam ha khappud ba ki poiwir na Bangladesh kim dei ban buhai shnong biang sa shisien ha ki lum baieid jong ngi namar lada ki wan biang, ngin sa kylla rit paid thikna kum ka Tripura.
Kine ki long ki jingbthah ia baroh ki Circles, Units bad District Units ka KSU:
1. Peit pyrman naduh step haduh miet ia ki briew mynder kiba wan rung sha Ri Khasi la ka dei na khappud Bangla ne Assam.
2. Wat la ka sorkar jylla ka la pynbna curfew ha khappud naduh 6PM haduh 6AM, hynrei ha kine ki por ki poiwir ki lah ban rung lyngba ki dalal.
3. Ia syllok bad ki bor shnong ban khanglad ia ki briew ba nabar ba wan sah ha la ki shnong.
Khatduh khatwai lada ki wan tur paidbah ki poiwir na kano kano ka thaiñ khappud, baroh ki dkhot kin hap khreh ban ia tur lang sha kata ka jaka.
Ngim pat lah ban teh lakam ia ka jingrung kyrthep ha u 1971, kumta ym long ban pynkhia shuh shuh ia ka lyngkor ia ki pateng da kaba ailad ha u 2024.
