Shillong, ïaïong, 27: Ka Khasi Students Union (KSU) War Jaiñtia Circle dang shen ka la pynthymmai bad pynskhem ïa ki nongkitkam jong ki lai tylli ki shnat treikam jong ka Circle, kata ïa ka KSU Amlarem Area Unit, KSU Mupyut Unit bad KSU Bakur Dawki Unit na ka bynta ka samoi treikam jong u snem 2025-2028.
U Education Secretary jong ka KSU-CEC samla Pynkmenlang Sanmiet uba la pynskhem ïa ki nongkitkam jong kine ki lai tylli ki shnat treikam u la ai ka jingïaroh ïa ki dkhot jong ka Bakur Dawki Unit kiba la ïoh bat ïa ki mynder Bangladeshi kiba rung be-aiñ shapoh u pud u sam jong ka ri bad u la banjur ba kin dang pynkhlaiñ shuh shuh ïa ka jingpeit pyrman ïa ka jingrung tuh jong ki mynder sha u pud u sam jong ka jylla Meghalaya lyngba ka khappud.
U ïaroh ruh ïa ki dkhot jong ki shnat treikam ka KSU West Jaiñtia Hills District kiba la shimkhia ban mih ryntih la ka long ha kano kano ka por ba ka seng ka dawa ban mih madan da kaba kdew nuska ïa ka jingïamih ryntih jong ki dkhot ha ka shnong Khliehriat kaba dei ka sngi rakhe ïa ka Khasi National Awakening Day lane ka Sngi Kyrsiew Ri.
Ha kane ka sngi, la sakhi lang da u Environment Secretary ka KSU CEC samla Shiningstar Kharbihkhiew, u Assistant Finance Secretary KSU-CEC samla Sonstar Nongkhlaw, u Waheh Shnong ka Dawki Bah Mankhraw Ryngksai, ki nongïalam ka KSU West Jaiñtia Hills District ba kynthup ïa u President samla Laitphar Syngkrem, General Secretary samla Leningrad Tariang, Vice President samla Chanbor War, ki nongïalam jong ka KSU War Jaiñtia Circle ba kynthup ïa u President samla Lop Stevenson Khonglah, General Secretary M. Platini Mukhim, samla Ladaplin Hayong bad kiwei kiwei.
