Shillong, Lber, 28: Ka MLA jong ka NPP na Sutnga-Saipung ka Kong Santa Mary Shylla ka la bthah ïa ka National Highway Authority of India (NHAI) ban pynthikna ba ka jingshna bad ka jingmarot ïa ka surokbah National Highway-6 dei ban pyndep noh shwa ban wan ka aiom lyiur.
Ka Kong Santa ka la hiar jurip ïa ka jingmaramot ïa ka surokbah NH-6 ha ka sngi Palei ryngkat ka jingsynran lang jong u Deputy Commissioner ka East Jaiñtia Hills District u Shivansh Awasthi, u Superintendent of Police ka East Jaiñtia Hills District u Giri Prasad, u Project Director ka NHAI, ki Kontraktor bad kiwei kiwei ki ophisar.
Ka MLA ka la pynpaw ruh ka jingsngewkhia ban ïohi ba ka jingtrei ka suki bha khamtam ka jingpyntrei ïa ka surok sakhmat ka Sonapur.
“Nga la jurip ïa ka shilynter jong ka surokbah NH-6 naduh Khliehriat haduh Malidor mynta ka sngi ryngkat bad ki ophisar ka NHAI lem bad ki ophisar ka district bad nga sngewkhia ban ïohi ba ka kam ka suki bha. Nga sngewsynei ïa ka jingeh ba la mad da ki nongshong shnong, ki nongleit nongwan kiba hap ban shah ïa u pumpum, ka jingdheng kali bad ka jingsniew jong ka surok. Ngan sa shimkhia hi dalade ïa kane ka kam bad ki bor ba dei peit bad ngin la bthah ïa ka NHAI ban pynthikna ba ka jingtrei pyndep ïa ka kam ka dei ban long shwa ban wan u slap,” ka la ong.
Nalor kaba jurip ïa ka surok, ki ophisar jong ka NHAI ki la pyntip ïa ka MLA ha ka jingïalang pyrkhat kam ba ka jingtrei ka ladep mynta kumba 65% bad ka jingtrei kaba sah mynta yn sa pyndep noh hapoh ar bnai.
U Deputy Commissioner Shivansh Awasthi u la pyntip ha ka jingjurip ba ki bor synshar district ki la ïatreilang bad ka NHAI ha kaba ïadei bad ka jingtrei kaba ïaid shakhmat bad ban ym shah ïaid ïa ki kali heh naduh ka por 9:00 baje mynstep haduh 5:00 baje janmiet da ka jingkyrpad jong ka NHAI khnang ba yn dup lah ban pynstet ïa ka kam. Hynrei, ka jingtrei shakmat ka Sonapur ha ka bynta jong ka shnong Kuliang, Umkiang bad Ratacherra ka long kaba suki haduh katta katta. La bthah ïa ka NHAI ban shim ïa ki lad ki lynti ban buh shuh shuh ïa ki nongtrei bad ïa ki mashin khnang ban pynstet ïa ka kam.
U Superintendent of Police Giri Prasad u la ïathuh ba ki don ki jaka kiba kham jynjar ha kaba bunsien ka jingsniew ki kali ka la lam shaduh u pud ka jingdheng kali bad la bthah ïa ka NHAI ban pynthikna ba kine ki jaka dei ban pyndep noh ïa ka jingtrei la kumno kumno hapoh 2 taiew.
Ha ka jingjurip ïa ka surok NH-6 la sakhi lang da u Waheh Shnong ka Umkiang, ki nongshong shnong kiba la kyrpad ïa ka NHAI ban pynstet noh ïa ka kam bad la kyntu ruh ïa ki bor synshar District ban ïai peitngor ïa ki kam ba la trei.
