Shillong, Risaw, 31: Ka Meghalaya State Pollution Control Board (MSPCB) ka la pynmih ïa ka hukum kaba bthah ïa ka Project Management Unit-Mylliem, kaba peit ïa ka jingpyntrei ïa ka surok Shillong-Dawki ba kan shim mardor ïa ki lad ki lynti ban khat ïa ki maw bad ka khyndew ba la pyntuid sha wah Umngot.
Ha ka shithi ba la phah sha u General Manager (P) Project Management Unit -Mylliem ha ka sngi Thohdieng, u Chairman jong ka MSPCB u R. Nanamalai u ong, “Mynta, namarkata, da kaba pyndonkam ïa ka iktiar ba la pynkupbor katkum ka kyndon 5 jong ka aiñ Environment (Protection) Act, 1986 la bthah kumne harum: ban pynthikna ba ïa ka Standard Operating Procedure kumba la kdew ha ka S.O1223(E) dated 17th March, 2025 dei ban bud pyrkhing bad ban khat lut ïa ki maw bad ka khyndew ba la bret ha ka wah Umngot.”
Ka Board ka la hukum, ‘baroh ki kontraktor jong ki, ki dei ban aplai ïa ka Consent to Establish/Consent to Operate na ka Board hapoh 15(khatsan) sngi.”
La bthah ïa ki kontraktor ba ki dei ban pyntreikam pura ïa ka Meghalaya Stone Crusher Order No. FOR.60/2008/Pt-I/17 dated 23rd December 2021 khamtam ha kaba ïadei bad ka jingtih ïa ki maw.
Ïa kine ki jingbthah la pynmih hadien ka jingjurip ba la leh da ki ophisar jong ka Board ha ka sngi Thohdieng (31 tarik u Risaw,), kaba la pynpaw ba ka don ka jingtih maw kaba jur, ka jingtih khyndew bad ka jingpyndap khyndew bad la theh ïa ki ha shilynter ka surok Shillong-Dawki (kaba dang don mynta ha ka jingpyntrei bad ïa kaba la phiah ha ki san bynta) khlem da ïada bha ne shim ïa ki lad kiba biang.
Ka jingjurip ka la lap ruh tang shu jam ïa ka jingkieng Pynursla-Dawki, ka jingpyndap khyndew ba dang shen la leh da ka NHIDCL na ka bynta ban ïada ïa ka jingtwa khyndew kaba la jia dang shen.
“Ïa ka jingpyndap khyndew la leh khlem kino kino ki jingïada kum ka jingker da ki byrni ba la thep da u khyndew ne kiwei kiwei ki lad ba pynskhem ïa ka jingtwa. La ïohi ba ka jingkynton khyndew ka la tuid sha wah Umngot, kaba buh jingma na ka jingtwa khyndew,” la ong ka Board bad bynrap ba ka bynta ba la pyndap hajan ka jingkieng ka paw ba kam long kaba skhem hynrei kaba lah ban jia ka jingtuid ka khyndew ha ka por slap.
La lap ruh ba ka jingshna ïa ka jingkieng Dawki ba thymmai ka dei ruh kawei ka lad kaba kynton ïa ka jingtuid ki maw bad ka khyndew sha ba wah da ka daw ka jingot ïa ki lum bad ka jingshong kynrong ka khyndew kaba tuid sha ka wah Umngot kaba nang wanrah shuh shuh ïa ka jingjngut jong ka wah.
La ïohi ba ka um jong ka Wah Umngot ha Shnongpdeng ka long kaba ktieh bad kylla rong ha ka por ba leit jurip.
Haba la tohkit na ki nongshong shnong, la pyntip ba ka wah ka dang kylla jngut dang ha kine ki khyndiat por ba ladep.
Ka MSPCB ka la shim ruh ïa ka nuksa jong ka wah Umngot na ka bynta ban leh test ha ka Laboratory bad ban bishar ïa ka jingjngut jong ka um bad ha kiwei kiwei ki bynta.
Ha ka ingaikren bad u Bah Trebor Suchen ha Darang, ki Ophisar ka Board ki la ïoh jingtip ba ka tyllong kaba wanrah ïa ka jingjngut jong ka wah ka dei na ka wah Umsong, kaba don ha Laitlyngkot (kaba lah ban dei kaba hap hapoh ka Package II jong ka project).
La ïathuh ba la bret ïa ka khyndew kaba la tih hajan kawei na ki shnat wah jong ka wah Umngot, kaba lah ban long ka daw jong ka jinglong rong saw kaba la ïohi shapoh wah, la ong ka Board.
Ïa kine ki jingbthah la pynmih hapoh ka Section 5 jong ka Environment (Protection) Act, 1986, bad la bthah ruh ïa ka Project Management Unit-Mylliem ban phah ïa ka kaiphod ba la pyntreikam ïa ka hukum ha ka por kaba biang.
