Shillong, Jymmang 16: U Myntri ka sorkar jylla u ba khmih ïa ka tnat Labour u Bah Shakliar Warjri u la bthah ïa baroh ki labour inspector ba kin pynlong ïa ki jingleit jurip sha baroh ki jaka jingtei kiba don ha ka jylla khnang ban lah ban peitngor ïa ka jingwan rung kyrthep jong ki nongbylla bar jylla beaiñ kiba wan sha kane ka jylla.
“Dang ha kine ki taïew ba la dep nga la khot ka jingïalang bishar kam bad nga la bthah bad ai por ruh ïa baroh ki labour inspector ba kin pynlong ïa ka jingleit jurip sha baroh ki jaka ba tei jingtei ha baroh ki block bad ki district. Na ka liang ka tnat ka la shim khia bha ha kaba ïadei bad kane ka kam,” ïathuh u Bah Warjri sha ki lad pathai khubor ha ka sngi Thohdieng.
Ïa kane u la jubab halor ka jingkylli ha kaba ïadei bad ka jingïoh bat jong ki sengbhalang ïa ki nongbylla bar jylla kiba la wan beaiñ sha kane ka jylla ban trei ha kiba bun ki kam jingtei ne ki kam shna ïing bapher bapher.
Haba ong ba ka long kaba kongsan ïa ki nongbylla bar jylla ba kin pynrung kyrteng ïalade bad ka tnat, u Bah Warjri u la ong, “Ngam don jingtip ïa kane ka jingma ha kaba ïadei bad ka jingwan rung kyrthep ki briew ba nabar, bad kam pat shym la wan ha ka jingtip jong nga hynrei lada ka long ha kane ka rukom na ka liang ka tnat kan shimkhia ïa kane ka kam.”
Haba ïadei pat bad ki contractor ki bym pynrung kyrteng ïa la ki jong ki nongbylla bar jylla u Myntri u la ong, “Uno uno u briew uba la ïoh ïa ki kam contract, ha shwa ban ïoh ïa ka work order kaba khatduh, u dei ban pynrung kyrteng ïa ki nongbylla.”
