Shillong, Risaw, 18: Ka ophis jong u Superintendent of Police (Traffic) ka East Khasi Hills ka la kyntu ïa ki kmie ki kpa, ki bahaing hasem ba kin da pynkup Helmet ïa la ki jong ki khun ki kti haba ki leit on bad leit shaw skul khnang ban ïada na kino kino ki jingjia ba sngewsih.
“La lap ba bun na ki khynnah kiba ju leit skul da ki thuk thuk ar shaka bad ki kmie ki kpa, ki hymmen ne para bad ki bahaïing hasem kim ju kup ïa ki Helmet bad kane ka buh jingma ïa ka jingim jong ki. Ha kaba ïadei bad kane, ka Shillong Traffic Police (STP) ka kyntu ïa ki paidbah kiba ju leit on bad leit shaw skul ïa ki khun ba dang rit da ki thuk thuk ba ki dei ban da pynkup ïa ki helmet khnang ban kiar na kino kino ki jingjia ba sngewsih bad namarba ka long ruh kum ka jingpynkheiñ ïa ki kyndon jong ka Motor Vehicle Act,” ong u Superintenden of Police (Traffic) East Khasi Hills u K. Prasad ha u kyrwoh ba la phah sha ki lad pathai khubor.
“Da ka jingthmu ban pynthikna ba ka leit ka wan ha surok kan long kaba shngaiñ, ka Shillong Traffic Police (STP) kan sa peitngor bad kan sa leh ruh da kaba tyngeh ïa kiba pynkheiñ ïa ki kyndon jong ka aiñ,” ong u kyrwoh.
