Shillong, Naitung, 15: Ka Khasi Students Union East (KSU) East Jaiñtia Hills District ha ka Lah Sngi u Blei ka la buh da ka Check Gate harud surok ban talasi ïa ki kot ki sla jong ki bar jylla kiba wan rung shapoh ka jylla Meghalaya.
Ha ki video ba la ring hi da ki dkhot ka KSU ba la phah sha ki lad pathai khubor la sakhi ruh ba ka seng ka la teh da ki banner kiba ong, “Inter State Migrants Workmen (Regulation of Employment and Conditions of Service) Act, 1979 ka la treikam hapoh ka Jylla naduh ka 28 tarik, Naitung, 2011,” “Ki Infiltration Gate ki shu long tang ki khyrdop lum pisa jongno re jongno,” “Meghalaya is not a safe haven for illegal immigrants,” “Pyntreikam noh ïa ka ILP bad ka MRSSA,” bad kiwei kiwei.
Tang hapoh khyndiat kynta ba ki dkhot ka seng ki la buh ïa ka Check Gate, shi kynhun ki Pulit jong ka East Jaiñtia Hills ki la wan ban pynsangeh noh ïa kane ka jingtalasi kot ïa ki bar jyllla da ka KSU.
Ka jingtalasi Work Permit da ka KSU ka la pynkhih win ha kylleng ka ri Khasi bad Jaiñtia ha kaba ki Pulit ki la khot hajir ruh ïa ki nongïalam jong ki shnat treikam ka KSU bad nalor kata la pynngat ruh ha ki kyndon bapher bapher da kaba pharep ba ki dkhot ka KSU ki la ktah kti ïa ki nongbylla bar jylla ha ki kynta ba ki dkhot ka KSU ki la rung sha ki jaka trei bylla.
