Shillong, ïaïong, 12: Ka Ka Confederation of Meghalaya Social Organisations (COMSO), kaba long ka shatri jong ki kynhun sengbhalang na rilum Khasi, Jaiñtia bad Garo ka la buh hakhmat ïa ka thong ban pynbor ïa ka Sorkar India ba kan pyntreikam noh mardor ïa ka Inner Line Permit, ka jingpynbeit thymmai ïa ka Meghalaya Residents Safety and Security Act (MRSSA) bad ban dawa ïa ka bhah thungkam kaba 40% ha ki tnat treikam jong ka Sorkar Pdeng.
Ha ka jingïalang ba la pynïaid da u President jong ka Hynñiewtrep Youths’ Council (HYC) Roykupar Synrem, la ïatai sani halor ka jingpynim ïa ka COMSO ban pynlong tang kawei ka bor kaba khlaiñ bad ban ïatreilang hapdeng ki jaidbynriew Khasi, Jaiñtia bad Garo da kaba buh hakhmat eh ïa ki mat jingdawa ba kongsan.
“Kawei na ki mat ba kongsan ba la pynpaw ha ka jingïalang mynta ka sngi ka long ka jingdonkam ban weng ïa ka jingwan knieh jaka da ka Assam, bad kumjuh ruh ïa ki jingwan buhai shnong beaiñ da ki jaitbynriew bym dei ki trai ri trai muluk hapoh ka jylla Meghalaya. Kane ka phang kaba la wanrah da u John Marak, ka khot ban tuklar kyrkieh, namar ka hok halor ka khyndew ka shyiap bad ka jingïada ïa ki jaka trai ri trai muluk ki long kiba kongsan ban im ki trai ri trai muluk ha Meghalaya. Kane ka mat, ryngkat bad ka jingïada ïa ka kolshor, ka ktien, bad ki marpoh khyndew,” ki la long ki mat ïakren ha ka jingïalang jong ka COMSO.
La pyntip ba ka jingpynim biang ïa ka Confederation of Meghalaya Social Organizations (COMSO) bad ka jingjied ïa ki nongkitkam ba thymmai jong ka ka pyni ïa ka mawjam kaba kongsan na ka bynta ki jaidbynriew trai ri trai muluk jong ka jylla Meghalaya.
Ka pyni ïa ka jingkular lang ban weng ïa ki jingeh ha ka imlang sahlang bad ka kolshor kaba ka jylla ka ïakynduh. Lyngba kane ka rynsan kaba ïatylli, ka COMSO kan dang ïai trei ban ïada ïa ka hok jong ki trai ri trai muluk, ban pynthikna ba yn ïohsngew ïa ka sur jong ki bad ban ïada ïa ka hok jong ki. Ka lynti kaba shakhmat ka long kaba jngai bad kaba eh, hynrei ka jingkut jingmut bad ka jingïatylli kaba la pyni mynta ka sngi ka ai jingkyrmen ïa ka lawei ha kaba ki jaitbynriew trai ri trai muluk jong ka Meghalaya kin lah ban roi, ban skhem ha ka jingtip ba ïa ki hok bad jinglong jong ki la ïada bad burom.
Ki dkhot jong ka COMSO ki khmihlynti ban ïatreilang bad ki bor Sorkar, ki sengbhalang bad kiwei kiwei ban weng ïa ki jingeh bad ki lad kiba bun kiba don hakhmat da ka jingthmu ban kyntiew ïa ka jylla Meghalaya na ka bynta ki jaidbynriew trai ri trai muluk jong ka.
