Shillong, Nailur, 03: U Nongïalam ka Liang Pyrshah u Mukul Sangma u la kyntu ïa ka Sorkar ba kan long kaba husiar, kaba peitngor, bad kaba shimkhia ïa ki jingma kiba lah ban mih bad ban weng ïa ki jingeh kiba pynlong ïa ki samla ban leit sha ki kam lehnoh.
U la buh jingkylli ruh halor ki jingjia ha kaba ïadei bad ka jingpyndem wait jong u Drishti Rajkhowa, u nongïalam barim jong ka seng kieng atiar ba la shah kheiñ be-aiñ ka United Liberation Front of Asom (ULFA), ha South Garo Hills.
Ha ka jingïakren bad ki lad pathai khubor ha ka sngi Balang u Sangma u la kdew ba mynshwa ka jingdon jong u Rajkhowa ha Garo Hills, kaba la pynshisha hadien da ka jingwan pyndem wait bad ki dang don ruh katto katne ki jingkylli kiba dang sah khlem jubab.
U la buh jingkylli ruh ïa ki briew kiba synran ïa u Rajkhowa ha ka por ba u la leit ban pyndem ïalade ha ki bor Pulit shwa ba un leit aiti.
“Ngi donkam ban kylli ïa ka Sorkar…katno ngut ki khynnah shynrang/shynrang ki don hangta? Hato la khmih lynti ba un don ha ka bynta kaba kyndong tam jong ka jylla tang bad arngut ki nong pahara jong u bad haba u la pyndem kiei ki tiar bad ki tiar siat kiba u la aiti lait noh tang ki tiar rit? Kumta phi hap ban pynïasoh ïa ki dak bad buh jingkylli pyrshah ïa ka Sorkar.”
U Sangma u la kynthoh ïa ka Sorkar, khamtam ïa u Myntri Rangbah ka jylla u Conrad K Sangma, namarba ka don ha ka “denial mode” ne ka jingkyntait bad kam shim ïa ka jingkitkhlieh ban pynthikna ïa ka khanglad ïa ka jingmih biang jong ki seng lehnoh ha ka jylla.
U la kynnoh ruh ba ka Sorkar kan pyrshang ban len khamtam eh Myntri Rangbah. “Phi kylli ïa kano kano ka kam. Phi kylli shaphang ka jingtih dewiong un kyntait,” la kynnoh u Sangma.
Haba kyntu ïa ka Sorkar ban long kaba husiar, bad kaba shimkhia, u Sangma u la ong, “Haba ngi ïakren shaphang ki jingïoh jingtip, hato kane ka jingpynrung kam don ha rilum Khasi Jaiñtia? Hato ym don jingpynrung ha Garo Hills? Ka shong ha ka Sorkar ban bishar ïa ki jingïoh jingtip bad ban pynshong nongrim ha ka jingstad. Lehse na kino kino ki daw, u Myntri Rangbah um da don than ïa ki jingtip kiba thikna shwa ban kren sha ki lad pathai khubor. Kata ka lah ban long ruh ba ka daw hynrei ha ka jingshisha ka Sorkar ka dei ban long kaba peitngor, kaba shimkhia.”
“(Ka Sorkar) ka dei ban tip kiei kiei kiba pynlong ïa ki samla ban ïaleh pyrshah, ban thaw ïa ka kynhun lehnoh bad ban peit ba ym dei ban ailad ïa kine kiei kiei ban jia bad ka dei ka kamram jong ka sorkar,” u la bynrap.
