Shillong, Jylliew, 16: Ka Dorbar Shnong Umshangling ryngkat ka Synjuk ki Phra Shnong ha ka Lah Sngi u Blei ki la shim ïa ka rai ban ailad biang ban bret ïa ki jaboh jabaiñ na ki shnong kiba hap hapoh ka sor Nongpoh hadien ba ki bor synshar jong ka Ribhoi District bad u MLA ka Nongpoh Constituency ki la pdiang ïa ki 14 tylli ki mat jingdawa ba la buh da ka Dorbar Shnong Umshangling.
Shwa ban ïathir ïatar halor ka jingeh ba ka shnong Umshangling ka ïakynduh na ka daw ka jingsma kaba mih na ka jaka bret niut, u MLA ka Nongpoh Constituency u Bah Myaral Born Syiem, u Deputy Commissioner ka Ri Bhoi u Abhliash Baranwal bad kynthup ruh ki nongmihkhmat na ka tnad Pynroi Sor, na ka NongpohTown Committee, ki Rangbah shnong ki la hiar jurip ïa ka jaka theh niut ban peit ïa ka jinglong jingman jong kane ka jaka.
U Secretary Shnong u Bah Vincent Sohwkhwai ula ïathuh ba ka jingdawa jong ka Dorbar Shnong Umshangling ka long ban shna pynbha shwa ïa ka surok kaba pynïasoh sha ka jaka theh niut, ban pynkhuid shuwa ïa ki jaboh ba la bret pathar bad ban buh ruh arngut ki nongap ha kane ka jaka thehniut bad kiwei kiwei de ki jingdawa.
