Shillong, Lber, 20: Ka Director ka Drug Reduction Elimination and Action Mission (DREAM) ka la buh thong tang hapoh ar snem ban pynduhjait ïa u drok ha kane ka jylla Meghalaya.
Haba kren sha ki lad pathai khubor hadien ka jingïalang ba la pynlong bad ki seng samla na ki shnong bapher bapher kiba don ha jylli ka sor Shillong, u Director jong ka DREAM Bah Francis J. Kharshiing u la ong ban tehlakam ïa u drok kam dei kaba suk bad kumta ka donkam ka jingïatreilang na baroh ki liang ha ka imlang sahlang.
U Bah Kharshiing u la ong ba hapoh ar snem, ka DREAM ka la buh ïa ka thong ban pynduh jait ïa u drok na ka imlang sahlang bad hapoh ka Jylla.
“Naduh ba nga shimti kum u Director ka DREAM, nga la kren shai ba kam dei kaba suk ban pynduh jait ïa u drok tang hapoh 3-4 bnai hynrei ki don shibun ki kam ba donkam ban leh, kata, da ka jingïatreilang ban pynsngewthuh halor ka jingma u drok,” la ong u Director ka DREAM.
Ha ka jingïalang ba la ïashim bynta da ki seng samla jong ki shnong bapher bapher ka la don ka jingai jingmut hapdeng kine ki ar kynhun haba ïadei bad kane ka mat kaba ktah ïa ka imlang sahlang.
U Bah Francis u la ong ba ki seng samla kiba ïashim bynta ha ka jingïalang ki la ai jingmut ban don ki jait jinghikai pyntbit ïa ki samla ha la ki shnong ki thaw khnang ba ki samla kiba la kiar na u drok kin ïoh ban pynlut por ban tei ïa ka jingim ba thymmai.
“Ki seng samla ki la ai jingmut ban ai jinghikai ïa kiba shah sumar ha ka jingkyrni drok khnang ba kin lah ban ïeng ha la ki jong ki kjat bad ban tei ïa la ka jingim ba thymmai hadien ba ki la lait na ka jingkyni dih drok” la bynrap u Bah Kharshiing.
