Shillong, Rymphang, 19: Ka jingïalang jong ki Sector Commander hapdeng ki shipai Border Security Force (BSF) ka ri India bad ki shipai Border Guard Bangladesh (BGB) ka la long ha ka sngi Balang hajan ka BGB Border Outpost Jawdanga ha Bangladesh ban pynkhlaiñ ïa ka jingïadei hapdeng kine ki ar tylli ki kynhun shipai ïada khappud.
Ïa ka kynhun shipai BSF ba la lamkhmat da u Dy Inspector General (DIG), Sector HQ BSF Tura u Lalit Mohan Sharma katba ïa ka kynhun shipai BGB la lamkhmat da u PBGMS, PSC, Sector Commander, BGB Mymensingh, Bangladesh u Col. Sarker Mohammad Mostafizur Rahman.
Ha ka jingïalang, kine ki arngut ki Commander ki la ïakren sani halor ka jingpynkhlaiñ ïa ka jingpahara ha khappud kynthup ruh ïa ka Coordinated Border Management Plan (CBMP) bad kiwei kiwei ki mat.
Baroh arliang mamla ki la pynpaw ïa ka jingsngewhun halor ki jingïakren bad ki la pynskhem ruh ïa ka thong ban pynneh ïa ka shongsuk shongsaiñ bad ban ïada ïa ka khappud na kino kino ki kam runar ruser.
Kine ki ar tylli ki kynhun shipai ki la ai jingïaroh markylliang ïa ka jinglah ban khanglad ïa ki kam runar ruser ha khappud bad ban pynkhlaiñ ruh ïa ka jingïatreilang bad la mynjur ruh ban pynlong na ka por sha ka por ïa ka jingïalang khnang ban pyntyllun shakhmat ïa ka jingïada ïa ka khappud.
Ka jingïalang ka la long kaba seinoh bad ka la nang pynkhlaiñ shuh shuh ïa ka jingïadei hapdeng ka ri India bad ka ri Bangladesh.
