Shillong, Lber, 27: Ka Khasi Students’ Union lyngba ka Employment Monitoring Cell ha ka sngi Palei ka la leit jurip ïa ka Roster Register ha NEIGRIHMS hadien ba ka KSU ka la leit pan jingpynshai na u Deputy Registrar jong ka NEIGRIMHS ha 24 tarik mynta u bnai halor ka Advertisement ba dang shu pynmih jong ki Nursing Officer bad kiwei kiwei ki post.
Katkum ka Advertisement ka don 105 tylli ki post Nursing Officer ba la pyllait bad ka bhah jong ki ST (K/J/G) dei tang 2 tylli na ka 105 tylli. Halor kane ka bynta na ka liang u Deputy Registrar u pynshai ba ki la bud thik ïa ka Roster bad kam shym la don kano kano ka jingleh shiliang ïa ki Khasi bad dei kane kaba pynlong ïa ka KSU ban dawa ban peit ïa kata ka Roster Register. Hadien ka jingïatainia na ka liang u Deputy Registrar u la hap ban kohnguh bad ban ailad ïa ka Seng kan peit ïa ka Roster Register bad ki Recruitment Policy jong ka NEIGRIHMS, la pyntip u Asst. General Secretary ka Khasi Students’ Union u samla Reuben Najiar ha u kyrwoh ba la phah sha ki lad pathai khubor.
Ha ka jingbishar ïa ka Roster Register ba la pynbiang na ka liang jong ka NEIGRIMHS, ka Seng ka la lap ba ki don shibun ki jingduna ha kaba ïadei bad ka bhah thungkam jong ki Khasi-Jaiñtia ha NEIGRIHMS, la ong u kyrwoh.
“Ka Seng ha kine ki sngi kan sa leit buh ïa ki mat jingdawa ban pynneh ïa ka hok jong ki trai muluk trai jylla. Katkum ka jingsakhi ka seng ïa ki kam baheh bad ki Permanent Post hi la bat da kiwei ki bym dei ki Khasi bad bun na ki Khasi kiba trei ha NEIGRIHMS ki dei tang kiba trei Contractual,” la pynpaw shuh shuh ka seng.
“Lah ïoh ban peit bniah ïa ki sakhi ha kaba ïadei bad ka Recruitment jong u snem 2023-24 bad ki snem ba ladep, halor ki jingmih na ka jingïakynduh, ka seng kan sa rah ïa ki mat jingdawa ha ka jingïakynduh bad u Director ha ki sngi ki ban wan,” la pyntip ka KSU.
