Shillong, Nailur, 19: Hadien bun bun sngi ba kawei ka longiing ka la mad ïa ka jingeh kaba khraw namar ka jingban jong ka jingduk jingkyrduh kat haduh ba ki la hap ban mad ïa ka jingshah thngan, ki nongïalam jong ka Federation of Khasi Jaiñtia and Garo People, Umling Circle ba la lamkhmat da u President u samla Banroy Wahlang ryngkat ka jingïatreilang bad ka FKJGP Umsohma Unit ha ka sngi Thohdieng ki la hiar sha ka shnong Umsohma, ban noh synñiang da ki marbam kum ka jingai kyrshan ïa kane ka longiing.
Kane ka dei ka longiing ka dei jong u Bah Ashik Marak bad ka Kong Sunita Ranee kiba don ruh ar ngut ki khun bad katkum ka jingïathuh jong u Secretary Shnong u Bah Turban Lyngdoh ka longiing ka la mad ïa ki jingeh namar ka jingban shaba palat ka jingduk.
U Secretary Shnong u la pynpaw ruh ka jingsngewnguh halor ka jingshimkhia jong ka FKJGP Umling Circle kaba la kloi ban noh synniang da ki marbam sah kane ka longiing.
