Shillong, Nailar, 06: Palat 30-40 ki nongdie madan ba dei hok ha ka thaiñ Khyndai Lad kim pat ïoh satia ïa ka Certificates of Vending (CoV).
Ïa kane la pyntip da u Bah EH Chen, uwei na ki dkhot jong ka Provisional Town Vending Committee (PTVC) hadien ba la wai ka jingïalang ha ka sngi Balang ba la khot da u Chairperson ka PTVC u PK Boro uba dei ruh u Chief Executive Officer (CEO) jong ka Shillong Municipal Board (SMB).
Ha ka jingïalang la ïashim bynta lang da ki nongdie madan kiba don hapoh ka shatri jong ka Shillong Roadside Hawkers’ Association (SRHA) bad ka Meghalaya Greater Shillong Progressive Hawkers and Street Vendors Association (MGSPHSVA).
Ka PTVC kan sa shong biang sa kawei ka jingïalang ban ïathir ïatai halor ka jingbym sam ïa ki CoV sha ki nongdie madan kiba dei hok ban ïoh.
Ha ka jingïakren bad ki lad pathai khubor ka President jong ka SRHA ka Kong Tell Me Nongbri, ka la pynpaw ïa ka jingsngewhun ïa ka jingïakren ha ka jingïalang da kaba ong ba ka jingïakren ka la long kaba seisoh bad kin dang ïai bteng ban ïatreilang ryngkat bad ka Sorkar ban pynsngew ïa ka jingeh jong ki para dkhot ki bym pat ïoh ïa ka CoV.
Ka la pyntip ba ka seng ka la pynsngew hakhmat ka jingïalang ba ki dang don ki nongdie madan ba la rim kiba dei hok ban ïoh ïa ka CoV ki bym pat ïoh satia haduh mynta mynne.
“Halor kane, ki ophisar ha ka jingïalang jong ka PTVC ki la kular ba kin sa khot sa kawei ka jingïalang ban ïathir ïatai halor ka jingsam ïa ki syrnot sha kito ki nongdie madan kiba dei hok,” la ong ka Kong Nongbri.
U dkhot jong ka SRHA u Bah E. Chen u la pyntip ba ki don kumba 30-40 ngut ki nongdie madan ha Khyndai Lad kiba dei ki dkhot jong ka SHRA ki bym pat ïoh ïa ka CoV.
U la ong ba ka PTVC ka la phah ïa ki kot ki sla ba donkam sha ka Shillong Municipal Board (SMB), kaba dei ka bor treikam kaba hap shim ïa ka jingkitkhlieh ban sam ïa ki CoV.
“Ngi kwah ban ïatreilang ryngkat bad ka Sorkar khnang ban pynthikna ruh ïa ka jingkylluid ki surok bad ka jingkhuid jong ka nongbah Shillong,” la bynrap u Bah Chen.
Katba ka President jong ka MGSPHSVA ka Kong Biolin Pyrtuh ka la ïathuh ka Shillong Municipal Board (SMB) ka la mynjur ban peit ïa ka thup kyrteng jong ki nongdie madan kiba la rim ki bym pat ïoh ïa ka CoV haduh mynta.
Hynrei ha kaba ïadei bad ki nongdie madan kiba die ïa ki marbam, ka la ïathuh ba kin hap ban shong beit shapoh ka Parking Lot jong ka MUDA namarba yn ym shah satia ba kin dang ïai bteng ban shong harud surok.
Ka la ong ruh ba katkum ka jingiakheiñ lang ka MGSPHSVA bad ka SRHA ki nongdie madan ki bym pat ïoh CoV ki don haduh 100 ngut, kata, 20 ngut ki dkhot ka SRHA bad sa kumba 80 ngut ki dkhot ka MGSPHSVA.
