Shillong, Rymphang, 26: U Chairman jong ka Maitshaphrang Tourism Promotion Group (MTPG) Bah Michael Syiem ha ka sngi Balang u la pynbna ba un pynlong da ka jingïakhih hakhmat ka ophis Secretariat naduh ka Lah Sngi u Blei jong ka taiew ban sa wan, kata, 3 tarik, Lber, 2025 halor ka jingkyntait jong ka Meghalaya Energy Corporation Limited (MeECL, CorporateAffairs ban dang aiwai ïa ka dewlynnong ha Lumpongdeng, kaba don ha pung Umïam.
Haba kren sha ki lad pathai khubor, u Bah Michael Syiem u la ïathuh ba u la ïoh pdiang ïa ka shithi na ka Meghalaya Energy Corporation Limited, CorporateAffairs ha ka 11 tarik, Naiwieng, 2024 kaba pyntip ba yn ym pynjlan shuh ban aiwai ïa ka dewlynnong Lumpongdeng hadien ka 31 tarik, Nohprah, 2024 bad hadien ka 15 tarik, Risaw, 2025.
U la kynthoh ruh da kaba ong, ‘balei ïa kiwei pat ka Sorkar ka kloi ban aiwai kylleng ki jaka hapoh ka jylla katba ïa ka Maitshaphrang Tourism Promotion Group la shu knieh kynthet ban pynïaid ïa ka jaka jngohkai ha dewlynnong Lumpongdeng”
U Bah Syiem ula ïathuh shwa ba ka Maitshaphrang Tourism Promotion Group ka la shimti ïa ka dewlynnong ha u Rymphang, 1997, ki don ki briew ki bym lah ban tip kiba ju leit sha ka dewlynnong Lumpongdeng da ki trok saw shaka ban ot ïa ki dieng haba rngad ka pung Umïam. “Mynta ka dewlynnong ka la kup biang ïa ka jingjyrngam namarba ngi la khang ban pom dieng bad baroh ki dieng ki la heh la san bad ki la shongdor da ki klur tyngka haba kheiñ ha ka dor pisa.”
“Mynta ka bynta kaba shajrong jong ka dewlynnong ka la long ka jaka shong jong ki khlieng bad kiwei kiwei ki jait mrad ba bunjait bad ka jaka rieh tngen jong ki Tyrpud,” la ïathuh u Bah Syiem bad bynrap, “hadien ba ngi la lah ban ri bad ban sumar ïa ka dewlynnong ka la long ka jaka kaba paka tam ban shongkai pyngngad, bad bun na ki samla lud ki ju wan ban sahmiet ha ki por shuti.”
“Hadien ba ngi la shna sa ïa ka Boat House ha u snem 2008 kaba nyngkong eh ha North East bad kaba nyngkong eh ha Meghalaya, ka dewlynnong ka la kylla long kawei na ki jaka jngohkai pyrthei kaba ju khring bha ym tang ïa ki nongjngohkai pyrthei hapoh ka ri India hynrei bun na ki nongjngohkai pyrthei nabar ri bad khamtam haba ki shijur kiba dang shu dep ïathoh shongkurim ki ju wan sah ‘honeymoon’ bad kumjuh ruh wat ki nongthoh kot ruh ki ju wan sah kai,” la pyntip u Bah Syiem.
Ka jingkiew ha ka jingwan ki nongjngohkai pyrthei sha ka dewlynnong ka la ïoh jingïaroh ruh na ka tnat Tourism namarba ka kyntiew ïa ka jingpynmih khajna na kaba aiwai ïa ki lieng, la ïathuh shuh shuh u Chairman ka MTPG.
U la pyntip ruh ba naduh u snem 1997 ka MTPG ka lah ban aikam ïa kawei ka longing kaba saw ngut kaba ju ri bad sumar, kaba ap ing bad kaba pynbiang ïa ka bam ka dih na ka bynta ki nongwan jngohkai sha ka dewlynnong.
“Namarba ngim don kano kano ka jingpyrshah ïa ka rai jong ka Corporation ban ym pynjlan shuh ïa ka jingshim wai, ngi la kyrpad ïa ka Sorkar ban ïarap jingkyrshan pisa ïa ngi khnang ba ngin dup lah ban ai sha ki nongtrei kiba la don mynta hapdeng ka jinglong tymmen bad kumjuh ruh ïa ngi kiba la pynpawnam ïa ka dewlynnong ka bym ju don ba tip satia 27 snem mynshwa kaba la kylla dur kum ka jaka jngohkai pyrthei bad kaba la pawnam ruh kum ka jaka sahmiet ha Meghlaya lyngba ka India Today NE Website ha ka 7 tarik, Jymmang, 2024,” la ïathuh u Bah Syiem.
