Shillong, Naitung, 21: Da ki spah ngut ki nongshong shnong jong ka shnong Mawpat ha ka Lah Sngi u Blei kiba rah da ki lama ïong ki la pakhang lynti ïa u Myntri ka tnat C&RD Block u Abu Taher Mondal bad ïa u Myntri ka Sorkar Jylla u Bah Alexander L. Hek uba long ruh u MLA jong ka Pynthorumkhrah Constituency katba ki dang thmu ban leit plie paidbah ïa ka ophis ba la shna thymmai jong ka Mawpat C&RD Block ha Umsarang kaba dang hap hapoh ka Raid Mawpat.
Ka jingrah lama ïong bad ka jingpyrshah jong ki nongshong shnong ba la lamkhmat da u Rangbah Shnong ka shnong Mawpat u Bah Judah Wahlang ka long halor ka nongrim ba ka tnat C&RD kam shym la burom ïa ka soskular ba ladep ïasoi bad ka Dorbar Shnong.
Namar ka jingbym ailad bad ka jingpyneh jong ki paidbah, u AT Mondal bad u Bah AL Hek ki la hap ban mih noh na Umsarang khlem da ïoh lad satia ban plie ïa ka ophis ba thymmai jong ka Mawpat C&RD Block.
Shwa ban tur ki paidbah ki Pulit kiba la ïoh jingtip halor kane ka jingpyrshah jong ka Dorbar Shnong ki la ieng pahara khang ban tem ïa kano kano ka jingïakulmar kaba lah ban mih ha kano kano ka por.
U Bah Judah Wahlang haba kren sha ki paidbah u la ong, ‘lada ka tnat C&RD Block ka kwah ban plie ïa kane ka ophis jong ka Block ka dei ban pynbiang ïa ka jingdawa jong ka shnong hynrei lym kumta ngin ym ailad (ban plie ïa ka ophis Block).”
“Ka hok jong ngi kaba shongnia ka don ka jingleh shiliang ha kaba ïadei bad ka jingsam (skhim) ha Block, ka Sorkar kam treh ban pynbeit ïa kata,” u la bynrap.
“Ha u snem 2016 phi la phah da ka jingthoh ban pan ïa ka jaka na ka Dorbar Shnong bad ngi la ai ïa phi,” ong uwei na ki nongïalam shnong ka Dorbar Shnong Mawpat hakhmat u Bah AL Hek bad bynrap, ‘ngi la ai da ka jingkmen bad ngi la jubab ruh tang hadien ar sngi.”
“Ngi la ïasoi ruh ïa ka soskular ha kaba u Bah PT Passah uba long u BDO la ïa thoh ïa ka shithi,” u la ong.
“Hynrei ïa ka soskular ba ngi ladep ïasoi ngi pynpaw hakhmat jong phi ba kim (tnat C&RD Block) shym la bat” u la bynrap.
“Ka jingthungkam thungjam kum ka shnong ngim pat ïoh pura,” u la ong.
“Ïa ka jaka ba ngi la ai da ka jingkmen hynrei ynda la thmu ban plie ïa ka ophis, ïa ka shithi (khot sngewbha) la shu phah tang lyngba ka WhatsApp ïa kaba ngim lah ban pdiang. Wan da ka lynti ka akor kaba dei. Haduh mynta hi ngim pyrshah,” u la ong.
