Shillong, Naiwieng,12: U Bah Baitlang Pohsngap, u rangbah uba shong basah ha ka shnong Khimusniang, West Jaintia Hills hadien ba um shym la ioh ïa ka tiket ban ïakhun na ka Voice of the People Party (VPP) ha ka Baar u la mih shakhmat ban pan ïa ka rai na ka sur jong ki paidbah ka Jowai South Constituency, lada ki ibit ïa u, un ïakhun ïa ka elekshon MDC sha ka Jaintia Hills Autonomous District Council ka ban sa long.
Ha ka jingïakren bad ki lad pathai khubor u Bah Baitlang Pohsngap u la kynthoh ruh ïa ki nongïalam jong ka VPP da kaba ong ba ïa ka rai ban ai tiket la shu leh hi da ka State Election Committee jong ka VPP khlem da ïasyllok bad ki paidbah nongshong shnong.
U la ong ruh ba lada ki paidbah ka Jowai South Constituency ki ibit ïa u ban ïakhun ïa ka elekshon u long uba kloi ban mih shakhmat ban shimti ïa kane ka lyngkor kum u shakri paidbah.
