Shillong, Jylliew, 15: Ka Joint Action Committee, Narpuh kaba kynthup ka shnong Umkiang, Ratacherra, Dona Skur, Dona Umbluh, Pyrtakuna, Kuliang, Borsara, haduh Tongseng, East Jaiñtia Hills District ka la rai ban pynlong da ka jingpakhang surok kaba khlem buh por ia ka surokbah National Highway-6 kata naduh Tongseng shaduh Malidor.
Katkum u kyrwoh ba la phah da u President ka JAC Narpuh u Bah L. Bareh u la pyntip ba kane ka jingpakhang ia ka surokbah NH-6 kan sdang naduh ka 19 tarik mynta u bnai ha ka por 7:00 baje mynstep bad ka JAC kan shah ban iaid tang ki kali kit nongpang, ki kali ba kit ia ki bor pahara bad ki kali jong ki nongthoh khubor, katba ïa kiwei kiwei ki kali ka JAC kan ym shah satia ban iaid.
“Ka JAC ka la shim ïa ka rai kaba tyngeh ban pynlong ia ka jingpakhang surok kaba khlem buh por ia kaba yn sa weng tad haduh ba ka Sorkar Jylla lyngba ka NHAI/ NHIDCL kan shna pyndep ïa ka surok bad ban maramot bha ïa ki thliew ki syar kiba la long kum ki krem ki kroh ha shilynter ka surokbah NH-6 ha ka thaiñ Namchiang ha Narpuh bad kumjuh bad shna ïa ki nala tuid um kiba paka,”ong u kyrwoh.
Ka JAC ka la kyntu ïa baroh ki paidbah nongshong shnong, ia ki nongleit nongwan ba kin iasnohkti lang ha kane ka jingpakhang surok namar ka jingleh kuman bad ka jingleh bym khein snep jong ka Sorkar ia ka thaiñ Namchiang ban shna pynbha ïa ka surokbah NH-6.
