Shillong, Nailar, 02: Hadien ka jingujor bad ka jingud jingnam na ki nongshong shnong namar ka jingbym biang ki rukom ai jingsumar bad ki jingdkoh ha ka Mawryngkneng Community Health Centre (CHC) ka Dorbar Shnong Mawryngkeng ka la leit ban pynsngew ha u MLA ka Mawryngkneng Constituency u Bah Heaving Stone Kharpran.
U Rangbah Shnong ka Mawryngkneng u Bah Peter J. Lawai, u la ong ba kane ka CHC ka dang long kum ka PHC namarba ka jingtreikam kam long katkum ba la khmihlynti da ki paidbah.
U la pyntip ba haduh mynta ka CHC ka don tang uwei u doktor uba treikam bad uba bat ruh kum u Block Medical Officer bad bunsien um lah ban don tang ha kawei ka jaka bad kam long hi ruh kaba suk ïa u ban sumar da ki spah ngut ki nongpang bad ym lah ban kynnoh ïa u doktor.
U la ong ba ha ka dorkhas, la kdew ïa kiba bun ki jingeh bad ki jingdonkam bad na ka liang u MLA u la kular ban rah ïa kane ka mat sha ka Sorkar bad sha ka Myntri ka Sorkar Jylla kaba khmih ïa ka tnat ka Koit ka Khiah ka Dr. Ampareen Lyngdoh.
U Rangbah Shnong u la pyntip ba ki dawai, ki nongtrei bad kiba pyntreikam ïa ki machine bapher bapher ki duna shaba palat.
U la ong ba kane ka long ka jinglehraiñ ba ïa kane ka CHC la kyntiew kyrdan khlem da don kano kano ka jingpynbiang da ka Sorkar bad u la bynrap ruh lada ym lah ban pynbiang, dei ban ieh beit ïa ka kum ka PHC.
Shuh shuh u la ong ba lada ym lah ban pyntreikam pura ïa kane ka CHC, ladei ban ai beit da ka jingthoh sha ka shnong ba kan sngewthuh namarba ka Sorkar kam lah ban leh eiei bad ki dei tang ki jingkular ha ka por election.
Na ka liang u MLA, u la pyntip ba un sa ïalam lang ïa ki nongkitkam jong ka Dorbar Shnong Mawryngkneng ban ïakynduh ïa ka Myntri ka tnat ka Koit ka Khiah khnang ba yn dup lah ban pynsngew ïa ki jingduna jong ka Mawryngknen CHC bad ïa ki jingdonkam jong ki nongshong shnong ka thaiñ.
