Shillong, Jymmang, 16: Ka Iingbishar Meghalaya High Court ha ka sngi Thohdieng ka la pynkynriah ïa ka jingbishar haduh ka 25 tarik, Jylliew khnang ban ailad ïa ka Sorkar Jylla bad ïa ka Harijan Panchayat Committee (HPC) ban wad bniah ïa ka ‘jinglah ban pynbeit’ ha kaba ïadei bad ka jingtyrwa kaba la sahteng la slem bha ban pynkynriah ïa ki 342 tylli ki longïing na Them Iew Mawlong.
Ha ka hukum, ka ïingbishar kaba kynthup ïa u Chief Justice IP Mukerji bad u Justice W. Diengdoh ka la ong, “da ka jingmynjur jong ki nongïasaid aiñ na ka bynta ki ar liang mamla, ïa kane ka jingujor bad ki aplikeshon kiba ïadei bad kane la pynsangeh noh haduh ka 25 tarik Jylliew, 2025 khnang ba ki arliang mamla kin wad ïa kano kano ka lad ban ïapynbeit.”
Ha ka 29 tarik, Ïaïong, u Symbud Myntri Rangbah uba khmih ïa ka tnat Kam Pohiing Bah Prestone Tynsong uba la pynïaid ïa ka jingïalang halor kane ka kam u la pyntip ba ka Sorkar Jylla ka dang ap ïa ka jubab na ka Ministry of Defence halor ka jingkyrpad ban ai jaka na ka bynta ban pynkynriah ïa ki 342 tylli ki longiing na Them Iewmawlong.
“Hooid, ha ka jingshisha ngi la ïakren ïa kane ka mat ruh bad mynta ngi dang ap ïa ka jingpyntip na ka Sorkar India lyngba ka Ministry of Defence namarba ïa ka shithi ladep phah sha ka Ministry of Defence bad ngim pat ïoh jubab na ki namar ha ka jingshisha ngi la kyrpad ïa ka Sorkar India lyngba ka Ministry of Defence lada ki lah ban ai jaka ïa ngi, khamtam ïa ka jaka bym pyndonkam ha ka jaka shipai,” u la ong.
“Ïa mynta, u Commissioner and Secretary jong ka tnat Pynroi Sor u dang ïai buddien bad ka Ministry of Defence bad ngi kyrmen ba ngin sa ïoh jubab shen,” la bynrap u Bah Tynsong.
Dang ha u bnai Kyllalyngkot, u Bah Tynsong u la ïathuh ba ka Sorkar ka ladep pynkhreh ïa ka Blueprint lada jia ba ka tnat Shipai kam lah ban ai jaka.
Katkum ka Blueprint, ka Sorkar ka la pynbna ban shna da ki iing lynter ha ka jaka kaba heh 2.5 akar jong ka Shillong Municipal Board khnang ban pynsah ïa baroh ki briew kiba sah ha Them Iewmawlong.
