Guwahati, Nailar, 24: Ka Directorate General of GST Intelligence (DGGI), Guwahati Zonal Unit, ka la kem ïa u Shiv Kumar Mittal, uba dei u trai jong ka GM Coke, Byrnihat, halor ka jingkynnoh ba um shym la siew ïa ka khajna GST kaba kot palat T.150.
Ïa u Mittal la kem na Tinsukia ha ka janmiet sngi Thohdieng hadien ka jingtohkit kaba neh da ki taiew ha kaba ïadei bad ka jingkhaïi Coke.
Ki bor pynïaid ki la kynnoh ba u Mittal u la thied ïa u Coke na ki katto katne ki karkhana beaiñ kiba don ha ka jylla Meghalaya bad shalan lyngba ki kot ki sla thok ba la pynmih ha ka kyrteng jong ki karkhana thok suda. La ïathuh ba bun na kine ki kompeni la thaw da kaba pyndonkam ïa ki kyrteng jong ki briew kiba na ki longïing ki baduk.
Ka DGGI ka la kynnoh ba u Mittal u la pyndonkam ïa ki kot ki sla kiba shongdor palat T. 150 klur da kaba buhrieh ïa ki jingshalan ba shisha bad kiar na ka jingsiew ïa ki khajna kiba heh.
Ka jingkem ïa u, ka long hadien ka jingkhynra ba dang shen ha Guwahati mynta u bnai, ha kaba la kem ruh ïa ki saw ngut ki briew namar ka jingdonkti jong ki ha ka kynhun kaba shna ïa ki kot ki sla thok kaba heh bha. Ki jingtohkit kiba hadien ki la pynpaw ïa ka jingïadei jong u Mittal bad ka kynhun kaba kham heh kaba treikam ha baroh kawei ka thaiñ Shatei Lammihngi.
Ha ki phra bnai ba la leit noh, ka DGGI, Guwahati Zonal Unit ka la kem 11 ngut ki briew ki bym siew ïa ka khajna GST na Assam, Meghalaya, Nagaland, Arunachal Pradesh, bad West Bengal.
Ka thymmei khubor ka ïathuh ba ka jingtohkit ka ngeit ba kane ka jingjia kaba mynta ka dei ka kynhun kaba heh kaba lah ban kiar na kaba siew ïa ka khajna kaba lah ban kot palat T.1,000 da kaba shu shna thok ïa ki kot ki sla.
Ka DGGI ka la pynthikna ba u Mittal mynta u dang don hapdeng ka jingshah tohkit ban lap ksai shuh shuh ïa ka jingïadonkti ha ka jingkhaïi beaiñ ïa u dewiong bad ka jingkhaïi ïa u Coke bad ban ithuh shuh shuh sa ïa kiwei kiwei kiba don bynta lang.
Ka DGGI ka la nang pynjur shuh shuh ïa ka jingbuddien halor ka jingshna ïa ki kot ki sla thok, ka jingkhaïi beaiñ, ka jingbym siew ïa ka khajna bad ka jingkem ïa u Mittal kan long kum kawei na ki lad ban pynduh pyndam ïa ki kam thok kam shukor kiba treikam ha kane ka thaiñ.
