Shillong, Naitung 22: Ka Hynñiewtrep Integrated Territorial Organization (HITO) ha ka sngi Baar ka la phah tuklar ïa u Myntri ka tnat Bording u Abu Taher Mondal halor jingbymsiew ïa ka Enhanced Duty Allowance (EDA) da ka Meghalaya Energy Corporation Limited (MeECL) sha ki Home Guard Volunteer kiba trei hapoh ka ophis jong ka MeECL.
Katkum ka HITO, ka MeECL ka la pulom ban pyntreikam ïa ki hukum jong ka ophis Civil Defence and Home Guards ha kaba ïadei bad ka jingsiew sha ki Home Guard Volunteer kiba trei hapoh ka MeECL.
Kine ki Volunteer ki la pyndep ïa la ki kamram kiba la trei da ki Security Guard jong ka MeECL mynshwa, hadien ba ka Corporation kam shym la thung shuh ïa ki Security Guard mynta la palat 40 snem.
Kine ki Home Guard Volunteer ki shim ki jingkitkhlieh ban trei ïa ki kam kiba donkam haba ïadei bad ki jingpyndait ïa ki tiar jong ka MeECL, kynthup ïa ki power station, sub-station, ki store, ki ophis, ki revenue collection center, ki checkpoint, bad ki gate. Watba ki la trei ïa ki kam kiba kongsan hynrei kim shim la ïoh ka jingsiew kaba biang ne kaba kham pynheh kiba long katkum ki hukum jong ka sorkar.
Ka HITO ka la kyntu ïa u Myntri ka tnat Bording ban tuklar ïa kane ka kam bad ban pynthikna ba ka MeECL kan bud ïa ki jingbthah haba ïadei bad ki jingsiew kaba dei ka enhanced duty allowance sha ki Home Guard volunteer kiba la pyndep ïa ki jingshah hikai.
“Ngi kyntu ïa phi ba phin bthah mardor ïa ka MeECL ba kan bud ïa ki hukum, ki jingpynbna bad ki circular, ba la pynmih da ka tnat,” ong u President ka HITO u Bah Donbok Dkhar ha ka dorkhas ba la aiti hakhmat u Myntri.
“Ha kajuh ka por ngi kyrpad ïa ka tnat ban pyntreikam ïa ka road map haba ïadei bad ki hukum ba la pynmih da ka personnel department ne ka Meghalaya State Electricity Regulatory Commission, ban pyndap ïa baroh ki kam kiba dang thylli kiba dei ban trei manla ka sngi,” ong ka HITO.
