Shillong, Ïaïong 04: Ka Hynñiewtrep Youth Council (HYC) ha ka sngi Thohdieng ka la leit ban khang khyrdep ïa ka ophis jong u Director of North Eastern Indira Gandhi Regional Institute of Health & Medical Sciences (NEIGRIHMS) u N Mehta hadien ba um lah ban pynurlong ïa ki jingdawa kiba don 4 tylli ki mat ha kaba ïadei bad ka rukom thungkam thungjam ha kane ka jaka pule.
Ki dkhot ka HYC ki la leit ruh ban pynlong ïa ka jingpyrshah bad leit tur sha ka ophis u Director, NEIGRIHMS hadien ba ka jingai por kaba 7 sngi ïa u ka la kut.
La ïohi ruh ba wat ki nongai jingïada ha kane ka jaka pule kim lah satia ban khanglad ïa ki dkhot ka HYC kiba leit ban pyrshah hakhmat ka ophis u Mehta ban dawa ïa u ba u dei ban iehnoh ïa kane ka kam mardor.
Ha kane ka jingpyrshah ka la pynlong ïa u Mehta bad ki ophisar ba kin hap mih shabar na ka administrative block.
U President ka HYC u Bah Roy Kupar Synrem haba ïakren bad u Mehta shabar ka Administrative Block u Director u la ong, “Ngi la aiti ïa ka dorkhas halor kane naduh ka 24 tarik u Lber bad kane ka jingai por kaba 7 sngi ka la kut mynta ka sngi. Naba kam don kano kano ka jubab na ka ophis ngim banse ban pynlong ïa kane ka jingpyrshah.”
Hadien ba u Mehta u la pynpaw ïa ka jinglong kaba kloi ban pdiang ïa kine ki jingdawa bad ba ula pynkhreh ban ai da ka shithi ban jubab ïa kane, na ka liang u Bah Synrem u la ong, “Phi la dei ban ïathuh ïa ngi shaphang kane hynrei phi khlem leh ïa kane bad ban ïakren bad ka seng wat hadien ba la dep ban ai por.”
Ha kaba ïadei bad kane ka jingpyrshah, kham hadien na ka liang u Director u la khot ïa ki nongïalam ka HYC ban ïakren halor kane ka kam.
Hadien ka jingïalang, u Bah Synrem u la pyntip ba ka seng ka la ïohpdiang ïa ka jingthoh pynthikna na u director ba kane ka jaka pule kan sa buh ïa ka examination centre hapoh ka jylla Meghalaya, kaba la ïoh jingithuh da ka sorkar pdeng kaba dei ka recruiting agency.
U la ïathuh ba kawei na ki jingdawa ba kongsan jong ka seng ka dei ban pyntreikam ïa ka 80:20 female to male ratio kumba la leh ha AIIMS bad kiwei ki jaka pule.
“Ha kaba ïadei bad kane na ka liang u director u la pynthikna ba un sa thoh sha ka Union Health Ministry ban ïoh ka jingpynshai ne ka jingpynskhem la ka NEIGRIHMS kan lah ne em ban pyntreikam ïa kane ka 80:20 female to male ratio naba kim don satia ki kyndon ha ka recruitment rules (RR) jong ka jaka pule. Namar kata ban pyntreikam ïa kane ka NEIGRIHMS ka donkam ban pynkylla ïa ka RR bad halor kane ka donkam ban ïoh ka jingmynjur na ka union health ministry,” ïathuh u Bah Synrem.
“Ngi la kren da kaba shai ba ngin ym lah ban shah ba ka jingthungkam kan ïaid shakhmat lada ka jingdawa 80:20 female to male ratio ym lah ban pyntreikam ha kane ka jaka pule,” u la bynrap.
Shuh shuh na ka liang u nongïalam ka HYC u la ïathuh ruh da kaba ong, “Ngi la dawa ruh ba ki dei ban pyntreikam ïa ka bhah kam kaba 44% na ka bynta ki ST kumba la pynaw ha ka OM jong ka Ministry of Personnel ha kaba ka NEIGRIHMS ka la shim ïa ki katto katne ki sienjam. Ka jingthmu ka long ban pynthikna ba ki briew jong ngi kin ïohkam ha NEIGRIHMS, NEHU, bad kiwei ki jaka pule ka sorkar pdeng, naba ha kaba kut hi ka sorkar jylla ka la dep ban ai ïa ki ka jaka ba kin buh ïa kine ki jaka pule da ka jingthmu ruh ba ki briew jong ngi kin ïohkam ïohjam.”
Haba kylli u Bah Synrem u la ong ba ka HYC kan khmih bniah ha shwa ba kan shim da kiwei pat ki sienjam halor kane ka kam.
“Ka online application ka la dei ban kut ha ka 20 tarik u Ïaïong, bad dei ha kane ka por ngin sa lah ban tip la ki jingdawa jong ngi kin urlong ne em bad ngi la kren da kaba shai ba ngin ym ai lad ban pynlong ïa ka jingthung kam lada ym pyntreikam ïa ka 80:20 female to male ratio,” u la bynrap.
