Shillong, Naiwieng 01: Ki Rangbah Shnong jong ka shnong Mawlai Nongkwar, Umthlong, Mawiong bad Mawiongrim ha ka sngi balang ki la leit ban ud bad nam hakhmat u Myntri ka tnat Public Health Engineering (PHE) u Marcuise N. Marak hapoh ka jingialam jong u MDC ka Mawlai Constituency u Bah Teiborlang Pathaw ban pynsngew halor ka jingslem ban trei pyndep ia ka skhim sam umbam umdih lyngba ka Jal Jeevan Mission (JJM) kaba don ha ka shong Lum Mawnei kaba tan ia ka um na ka tyllong um Lum Shyllong.
Lyngba ka skhim JJM, ka tnat PHE ka la buh thong ban pynpoi ia ka umbam umdih sha ki saw tylli ki shnong, kata, ha ka shnong Nongkwar, Umthlong, Mawiong bad Mawiongrim ban pynpoi ia ka umkor sha ki 3 hajar tylli ki thliew iing.
Ha ka jingiakren bad lad pathai khubor u Bah Teiborlang Pathaw u la iathuh ba ka jingkynduh ia u Myntrri ka long ban kham pynsted ia kane ka kam ha ka por kaba biang bad kumjuh ruh ban pyndep ha ka por ba ka Sorkar ka la buh.
U la iathuh ba kat haduh mynta ka jaka pyllang um hapoh ka shnong Mawiong bad Mawiongrim ka ladep bad mynta ki dang sdang sa ha ka shnong Umthlong Lum Mawnei bad ka Treatment Plan ha Lum Mawnei.
Shuh shuh u la iathuh, na ka daw ka jingjur shaba palat u slap ha kine ki bnai ba ladep ym shym la lah satia ban pyntrei ia kane ka skhim bad u la pynpaw ka jingkyrmen ba mynta ka bneng ka la rang na ka liang jong ka Sorkar kan sa bthah noh ia ki nongtrei ba kin sdang ban shna noh ia ka Treatment Plan.
U la iathuh ba ki dang don katto katne ki jaka kiba dang hap ban ia pynbeit hynrei na ka liang jong kine ki bor synshar shnong kin sa pynbeit ia kane ka kam khnang ba yn dup lah ban shna pyndep ia kane ka skhim hapoh u snem 2024.
Ia kane ka skhim JJM ha Lum Mawnei kaba kot 95 klur tyngka la buh mawnongrim da u Myntri Rangbah ka Jylla u Conrad Kongkal Sangma ha u snem 2022 da ka jingsakhi lang jong Myntri barim ka tnat PHE u Bah Reniktor L. Tongkhar, u MDC ka Mawlai Constituency u Bah Teiborlang Pathaw bad ki Rangbah Shnong jong ki shnong bapher bapher ka Mawlai.
