Shillong, Rymphang, 13: Ki dkhot jong ka Hynñiewtrep Youths Council (HYC) Mawlai Circle ha ka sngi Palei hapoh ka jingïalam jong u President u Bah Donboklang Kharlyngdoh bad u Vice President u Bah Bashan Lyngdoh Mawnai ki la leit ban kynduh ïa u Executive Engineer jong ka Meghalaya Energy Corporation Limited, Shillong West, u Bah Arju Dkhar ha ka shlem treikam kaba don ha Lumjingshai ban dawa ba dei ban maramot ïa baroh ki Solar street light kiba don hapoh ka jylli jong ka shnong Mawlai ki bym treikam shuh.
Kum ban shu pyntip ba ïa kine ki solar street light la pynieng ha nongbah Shillong naduh shiphew snem mynshwa kata naduh u snem 2014 bad la antad ba ka jingpynlut ha kane ka project ba la thung haduh 300 tylli ki Solar street light ka kot ym duna ïa ka 4 lane 5 klur tyngka eiei.
U Bah Arju Dkhar ka jingïakren bad bad kine ki nongïalam jong ka seng u la kular ban shimkhia da kaba phah jurip ïa ki Junior Engineer ha ki khyndiat sngi ki ban sa wan bad u la kular ruh ban phah ïa ka jingmang pisa sha ki bor bahalor na bynta ban leh ïa ka jing maramot.
Tang hapoh ka jylli jong ka shnong Mawlai ki solar street light kiba la thung ki don ym duna ïa ka 30 tylli.
