Shillong, Nailur, 13: Ka synjuk ki nongpathai khubor, Meghalaya Editors and Publishers Association (MEPA) ka pynpaw ïa ka jingsngew bynñiaw halor ka jingkhlad noh u Myntri Rangbah barim ka jylla u Dr. Donwa Dethwelson Lapang
Ka MEPA ka pynpaw ïa ka jingsngewsih kaba khraw na ka bynta ka jingkhlad noh u Dr. Lapang, uwei na ki riewsaiñ pyrthei uba khraw tam ha jylla uba dei ruh u President ba nyngkong eh jong ka MEPA.
Shwa ban shim bynta kum u President ka MEPA, u Dr. Lapang u la noh synñiang shikatdei eh na ka bynta ka kam pathai khubor ha kaba u la shimti ban seng ïa ka kotkhubor U Peitngor kaba la shakri ïa ka imlang sahlang bad kyntiew ïa ki rangbah bad sanmla ha ka kam thoh khubor ba dang ïai bteng haduh mynta mynne.
Ka phang ban kyntiew shaphrang ïa ka kam thoh bad pathai khubor ka la nang bteng shuh shuh ha kaba u la aiti kawei ka shlem treikam ki nongthoh khubor, ka iing ba pura ïa ka Shillong Press Club, khnang ba ki nongthoh khubor kin ïoh la ka jaka ba paka na ka bynta ban kyntiew ïa ka pathai khubor bad ban byrngia para nongthoh khubor.
Ha ka jingïakynduh kyrkieh ki paradkhot ka MEPA ki la ñiew burom ïa u Dr Lapang, da kaba kynmaw tympang ïa byllai ki kam kum u nongaibuit bad ai mynsiem ïa ki nongthoh khubor.
