Shillong, Jylliew 13: Ka sorkar jylla ka la bynshet ha u Chief Secretary ka jylla u Bah DP Wahlang ban pule bniah ïa ka kaiphod ba la aiti da ka Expert Committee halor ka jingbishar ïa ka bhah thungkam thungjam ka jylla ne ka State Reservation Policy.
Haba ïathuh ïa kane ha ka sngi Thohdieng, u Nongaiktien ka Sorkar MDA u Bah Paul Lyngdoh u la ong ba ka Expert Committee ka ladep ban aiti ïa ka kaiphod sha ka Sorkar Jylla.
“Namarkata, mynta ka shong sa ha ka sorkar ban pule bniah ïa ka kaiphod. Kumba ka long, ngi la aibor ha u Chief Secretary ka jylla ryngkat lang bad ki heh ophisar ban pule bniah ïa kane ka kaiphod,” u la bynrap.
Haba ong ba kane ka kaiphod kadei kaba bun sla bha bad kaba heh, u Bah Lyngdoh u la ong ba ka jingbatai ba lyngkot jong kane ka kaiphod yn sa wanrah hakhmat ka jingïalang ka kynhun Myntri sorkar.
“Ïa ka kaiphod kaba pura pat yn sa wanrah hapoh ka meij jong ka Ïingdorbar Thaw aiñ ka jylla ka ban long ha u Nailar mynta u snem,” la ïathuh shuh shuh u Bah Lyngdoh.
Kane ka Expert Committee la khlieh da u Justice (Retired) Mool Chand Garg la thaw da ka sorkar jylla ha ka 12 tarik u Nailar, 2023, ban khmih bad bishar ïa ka bhah thungkam kaba mynta kaba don ha ka jylla hadien ka jingmih ki jingdawa na kiba bun ki liang.
