Shillong, Jymmang, 10: Katto katne ki samla pule ki la mih shakhmat ha ka sngi Saitjaiñ ban pynpaw ïa ka jingsngewsih kaba khraw hadien ba ki la ïoh jingtip ba ki la hap ban leit thoh ïa ka eksamin Central Examination Entrance Test (CUET) shabar ka jylla namar ka jingduna shaba palat jong ki shlem pule ha kane ka jylla Meghalaya kiba lah ban pynlong ïa kane ka eksamin.
Ha ka jingïakren bad ki lad pathai khubor ha Shillong Press Club, ki samla pule ki la ïathuh ba katkum ka jingpynbeit jong ka National Testing Agency (NTA) la bthah ïa ki samla pule ka jylla ban leit ïakhun ïa ka eksamin CUET sha Guwahati, Mizoram, Kolkata bad sha kiwei kiwei de ki jylla.
Ki la ong ba lada ka Sorkar kam shimkhia kim banse ban pynlong da ka jingïakhih.
“Bun na ki khynnah Khasi jong ngi, ka Centre (thoh eksamin) ki ïoh shabar jylla. Ki don kiba shah pyngat sha Guwahati, sha Mizoram, sha Kolkata bad sha kiwei kiwei ki jylla. Ka jinglut ksan ka la kham bun ha ka bai leit bai wan, ka bai sah Hotel, bad ka baibam,” la ong uwei na ki samla.
“Kane ka la buh jingeh haduh katta katta khamtam eh ïa ki khynnah kiba wan na ki longing ki baduk ki bym kot bor. Nangne (na Shillong) sha Kolkata ban thied ïa ka tiket bai liengsuiñ ar sngi shwa kan kot la kumno kumno T.5-6 hajar. Ka la buh jingeh bha ïa ki khynnah. Sa ka bai hotel ba ki hap ban wai kamra. Ka jingshah pynngat ban leit thoh eksamin shabar bun na ki khynnah kim kwah shuh ban dang leit thoh ïa ka eksamin CUET,” la pynpaw une u samla.
“Uwei u paralok jong nga, dang ha kine ki sngi u la telephone ïa nga ba ym kwah shuh ban leh ïa ka CUET namarba um kotbor ban siew ïa ka bai leit bai wan sha Kolkata, West Bengal,” la ong shuh shuh une u samla bad bynrap, “ki kmie ki kpa tang shu ïohi ïa kane kim mon shuh ban dang phah pule ïa ki khun.”
“Ka Sorkar ka la dei ban leh eiei halor kane bad ngim don por shuh namarba ka First Paper kan sdang ha ka sngi Baar (jong ka taiew ban sa wan). Ngin leh kumo mynta. Bun ki khynnah kim treh shuh ban bteng ïa ka jingpule Degree. Lada ka jingpep skul ka kiew phin kynnoh shuh ïano? la buh jingkylli une u samla.
“Ki kmie ki kpa ki la duh jingkyrmen bad ka la dei ruh ka jingkit kaba khia ïa ki kmie ki kpa namar ha ka khyllipmat ba khatduh yn hap ban thied da ka tiket ban leit da ka liengsuiñ,” u la ong.
U la ïathuh ruh ba ka eksamin ba ki hap ban thoh kam dei tang shi sngi hynrei kin don ha ka sngi kaba bud bad kumta ter ter.
“Lada dei wat tang ha Guwahati (ka NTA) kam pyntip haei ka jaka thoh eksamin. Ngi hap ban leit wad ïa ka jaka thoh eksamin bad kane kan bam por,” la bynrap shuh shuh u samla.
“Ngi kyntu ïa ka Sorkar khamtam ïa u Myntri uba khmih ïa ka tnat Pule Puthi ba kin leh eiei halor kane namar ka duna palat ka jingailad ban thoh ïa ka eksamin ha Shillong,” pynpaw une u samla.
Shuh shuh u la ong katkum ka jingtip jong u, ki samla pule kiba pynrung kyrteng na ka bynta ban ïakhun ïa ka eksamin CUET ki duna bha haduh katta katta.
“Haba duna ïa ki Computer Base Mode Examination balei phim lah ban leh eiei,” la kynthoh une u samla ïa ka Sorkar.
