Shillong, Nailar, 12 : Ka Hynñiewtrep National Liberation Council (HNLC) lyngba u General Secretary cum Publicity Secretary ka seng u Bah Saiñkupar Nongtraw lyngba u kyrwoh ba la pynmih ka Facebook Post ha ka sngi Saitjaiñ ka la byrngem ba ka lah ban weng noh na ka miej jingïakren iasuk hapdeng ka Seng, ka Sorkar Pdeng lem bad Sorkar Jylla na ka daw ba ka seng wat hapdeng ka jingïakren iasuk bad ka Sorkar ka la shah pyrkhing ban leit buh syntiew ha u lum jingtep jong u Bah Cheristerfield Thangkhiew ha ka lyngkhuh sngi iap ba ar snem jong une u rangbah uba long teng u nongialam barim jong ka seng.
U Bah Saiñkupar Nongtraw ha ka Facebook post, u la ong, “lashai ha ka lyngkhuh sngi iap ba ar jong u Bah Che, ka jingleit buh syntiew sha lum jingtep la pynbeit da ki bahaing ba kan long 2 baje janmiet, katba ka sorkar ka ai hukum ia ki briew jong ngi kiba don ha ka jingiakren iasuk ba ki dei ban leit buh syntiew dang 8 baje mynstep.”
“Kane ka jingleh jong ka Sorkar ka pynbitar ia ka seng hi baroh kawei, ngim dei ki Pulit Meghalaya ne ki nongtrei sorkar jong ki ba kin teh ia ngi katba ki mon. Lada ka long ha kane ka rukom ngin weng noh na ka jingiakren,” la bynrap u Bah Nongtraw.
