Shillong, Nailur, 02: Ka Federation of Adhoc School Teachers of Meghalaya (FASTOM) ka la pynbna ban mih paidbah sha surok na ka bynta ban pyrshah ïa ka jingbym lah ka Sorkar Jylla ban pynkiew ïa ka tulop jong ki nonghikai skul Adhoc ha ka jylla.
Ha ka jingïakren bad ki lad pathai khubor ha ka sngi Baar, u Vice President ka FASTOM u Bah Sanbor Jungai u la ong ba ka Federation ka la rai ban pynlong ïa ka General Body Meeting ha ka 13 tarik mynta u bnai ha Tura, West Garo Hills, ban shim rai khatduh ïa ki jingïakhih. Ka jingïakhih kan long ha kajuh ka por ha Shillong bad ha Tura.
U la ong ba ka FASTOM ka la dawa ïa ka jingsiew kaba kham bha bad ki jingmyntoi na ka bynta ki nonghikai Adhoc, kynthup ruh ban kyntiew kyrdan sha ka Deficit System, ka jingpynkiew tulop kaba 5% manla u snem bad ka jingpynjlan ïa ka rta shongthait na ka 60 sha ka 65 snem bad ïa ka dorkhas jingpynkynmaw ladep ai ruh sha u Myntri ka tnad Pule Puthi u Rakkam A. Sangma ha ka 17 tarik, Lber, 2023.
Katkum ka jingong u Jungai, ka tulop jong ki nonghikai Adhoc mynta ka long naduh T. 18 hajar ïa ki nonghikai kiba hikai ha ka kyrrdan Lower Primary, T. 22 hajar ïa ki Upper Primary, T. 29 hajar ïa ki Secondary, T. 31 hajar ïa ki nonghikai Science, T. 33 hajar ïa kiba hikai ha ka Higher Secondary.
Haba pynpaw ïa ka jingsngewsih ïa ka kaiphod jong ka Meghalaya State Education Commission (MSEC), u nongïalam ka FASTOM u la ong, “ngi la kyrmen ba ka tnad Pule Puthi jong ka jylla, kaba la thaw ha u bnai Naitung, 2023, kan weng ïa ki jingeh kiba ki nonghikai Adhoc ki ïakynduh hynrei ka kaiphod ba la aiti sha ka Sorkar kam shym la kynthup ïa kino kino ki jingai jingmut na ka bynta ka jingdawa ban kyntiew tulop ïa ki nonghikai Adhoc.”
“Nalor kane, ka Federation ka la ai katto katne ki dorkhas sha u Myntri Rangbah ka Jylla, u Symbud Myntri Rangbah ka Jylla, u Myntri ka tnat Pule Puthi, bad ha ki ophisar jong ka tnad pule puthi, hynrei ïa ki jingdawa jong ngi kim shym la pynurlong,” u la bynrap.
U la pynpaw ba ka jingpynkiew tulop kaba khatduh eh ka dei ha u snem 2022, hadien ka jingïakhih hynrei watla katta ka jingpynkiew tulop kam shym la lah ban weng ïa ki jingeh jong ki nonghikai Adhoc namar ka jingkiew dor jong ki marbam mardih bad khamtam haba ki nonghikai ki don hapdeng ka pang ka shitom.
“Ngi shem jingeh ban ai ïa ka jinghikai kaba bha ïa ki khun ki kti jong ngi bad ka jingsumar kaba biang ïa ki bahaing hasem jong ngi,” u la ong.
U Bah Jungai u la ong, watla ki nonghikai Adhoc ai ka jinghikai kaba bha sha ki hajar ngut ki khynnah skul, hynrei ki nonghikai Adhoc ki hap ban ïakhun pyrshah ïa ka jingbym biang ka tulop, kaba pynlong ïa ki ban shem jingeh ban pyndap pynbiang ïa ka ïing ka sem lajong.
Ki nonghikai Adhoc ki ïakynduh jingeh wat ban siew ïa ka bai pule kolej na ka bynta ki khun nalor ka jingsheptieng wat ban leit shah sumar ha ki Hospital namarba ka jinglut ka jingstep bad ka bai dawai dashin ki long ka jingkit kiba khia, la pynpaw u Bah Jungai.
“Bunsien la pynbor ïa ki nonghikai ban shim ram na ki bahaïing hasem bad na ki paralok ba lah ban shaniah,” u la ong da kaba bynrap ba bun ki nonghikai Adhoc ki shongthait khlem ïoh jingmyntoi eiei bad kane ka pynlong ïa ki ban im ha ka jingsngewsih bad ka jinglynga mynsiem namar bym biang shuh ka kamai kajih.
“Ka jingbym ïoh shuh ïa ki jingmyntoi hadien ba la shongthait kaba pyndiaw mynsiem bha ïa ngi bad bun na ngi, ngi im hapdeng ka jingsuhsat bad ka jingdukha mynsiem,” la pynpaw shuh shuh u Bah Jungai bad ong ruh, ‘ngim don lad shuh da kumwei pat bad ngi dei ki jait nonghikai kiba la shah iehnoh beiñ tam ha Meghalaya.”
Katkum ka jingong jong u, ka la dei ka por ïa ki nonghikai Adhoc ban ïatylli bad ban mih shakhmat ban dawa ïa la ka jong ka hok.
