Shillong, K’lyngkot, 06: Ki Pulit ka jylla ki la pynkhlaiñ ïa ka jingpeitngor bad ka jingpahara hadien ba la ïoh pdiang ïa kawei ka jingthoh lyngba ka email ha ka sngi Thohdieng ba la byrngem da kawei ka kynhun lehnoh kaba la tip kum ka Terrorizers111.
Ha u kywoh, ka Terrorizers111, ka la kam ba ka ladep ban buh ïa ki bom ha manla ki Iingbishar jong ka ri India kynthup ruh ha ka Iingbishar Meghalaya High Court.
Katkum ka jingtip ba la ïohlum, ka Iingbishar Meghalaya High Court ka la ïoh pdiang ïa ka email byrngem ha ka por 5.45 baje mynstep Sngi Thohdieng.
Ïa kane ka email, hadien ka jingwad bniah la lap ba la phah na ka Morguelol545@gmail.com kaba ong, “nga ladep buh bom ha baroh ki Iingbishar jong ka ri India. Ïa kine ki bom la buh ha ka jaka bakyndong bha bad kin sa bthei ha ka por mynstep. Phin sa mad ïa ka jinglyngkien jong ka snam.”
“Ngi dei na ka kynhun lehnoh kaba la tip kum ka Terrorizers111. Ai ïa ka kyrteng jong ka kynhun jong ngi sha ki lad pathai khubor ruh ngin ym sangeh na ka jingleh ïa ki kam pyntriem jong ngi,” la ong u kyrwoh.
U Superintendent of Police jong ka East Khasi Hills Bah Sylvester Nongtnger u la ïathuh ba ki Pulit ki la ïoh jingtip halor kane bad ki la pynlong ïa ka jingtohkit kaba bniah bad ka jingpeitngor ha kaba u la ïathuh ruh ba u Addl SP bad ka kynhun Pulit ki la don ha Ingbishar Meghalaya High Court ban ap pahara.
Nalor kata, u la ïathuh ba ka tnat Pulit ka la phah ruh ïa ki Bomb Squad ryngkat bad ïa ki Ksew ne ki K9 Unit sha iingbishar Meghalaya High Court ban wad bniah, ïoh ka don shisha ka jingbuh ïa ki bom hapoh ka Ïingbishar.
