Shillong, Risaw 16: Ki nongshet ja sngi ha ki skul bapher bapher jong ka Jylla kiba don hapoh ka shatri jong ka Union of Cook cum Helpers PM POSHAN Meghalaya (UCCHPM Poshan) ki la byrngem ban sangeh treikam lada ka Sorkar Jylla kam siew ïa ka bainong hapoh une u bnai Risaw.
Ka President jong ka Union ka Kong Banalis Syiem ha ka jingïakren bad ki lad pathai khubor ka la ong, “ka Sorkar Jylla ka la kular ban siew ïa ka Honorarium kaba 6 bnai hynrei haduh mynta ka Sorkar kam pat siew eiei hynrei ka dang siew tang na ka bynta lai bnai. Hynriew bnai ngi la trei hynrei ngim pat ïoh jingsiew eiei nalor ba ka jingïoh bainong ka long kaba rit.”
“Ngi dang ïoh ïa ka jingsiew jong u bnai Ïaiong, Jymmang, Jylliew bad kaba sah ka long naduh u bnai Naitung, Nailar bad Nailur ter ter haduh mynta kim pat siew. Hynrei ha ka jingïakren, ki ong ban siew baroh hynriew bnai hynrei ka pisa kaba ki siew ka long tang na ka bynta lai bnai,” la ïathuh ka Kong Syiem.
“Lada ka Sorkar kam siew hapoh une u bnai Risaw, ngi la shim da ka rai ban sangeh shwa ka jingleit shet ja sngi ha ki skul,” la ong ka Kong Syiemlieh.
“Daei ki khun jong ngi kin bam haba ngim ïoh bainong? Ngin bsa da kaei ïa ki khun ki kti? Lada ka Sorkar kam siew dep ïa ka bainong jong ki bnai kiba ngi ladep trei, ngi la rai ban sangeh leit shet ja sha ki skul, tad haduh ba ka Sorkar kan da siew shwa ïa ka bainong,” ka la ong.
Naduh 15 tarik, Nohprah ka Sorkar Jylla ka la kyntiew ïa ka jingsiew Honorarium na ka T.100 spah sha ka T.1000 hajar, katba ka Sorkar Pdeng ka siew bainong T.900 spah. Ha ka shi bnai ki nongshet ja sngi ki ïoh bainong T.2000 hajar. Kaba kham sangsot ka long ba ki nongshet ja sngi ha ki skul ki ïoh bainong tang ka bynta 10 bnai, katba ha ka shuti tlang kim ïoh jingsiew eiei ruh em haduh ar bnai tam.
“Ngi kyrpad ïa ka Sorkar Jylla bad ïa u Myntri Rangbahduh ka ri u Narendra Modi namarba ngi ladep phah ïa ka jingthoh ba un pynkiew ïa ka jingsiew Honorarium bad ban siew bainong na ka bynta 12 bnai hynrei ym tang na ka bynta 10 bnai. Hynrei haduh mynta ka Sorkar Pdeng kam shym la patiaw satïa ïa ka jingkyrpad jong ngi,” la ong ka Kong Syiemlieh.
“Ngi kyrpad ïa u Myntri Rangbah ka Jylla Conrad Kongkal Sangma ba un ïakren bad u Myntri Rangbahduh ka ri Narendra Modi ïa ka khia ka shon jong ngi ki nongshet ja sngi ha ki skul nalor ka jingsiew ka barit, ki pynthud pat ïa ka rukom siew bainong ïa ngi ki nongshet ja sngi ha ka jylla baroh kawei,” la kyrpad kane ka nongïalam jong ka Union.
Katkum ka jingïathuh jong ka Kong Syiem, kiba bun ki nongshet ja sngi kim shym la ïoh ïa ka pisa kaba ju pynpoi beit ha ka Bank Account jong ki. “Haba ngi buddien, ngi lap ba bun na ki nongshet ja sngi khamtam ha them Ribhoi ka pisa kam poi satia ha ka Bank Account jong ki hynrei ka poi pynban sha ka Account jong ki skul bad sha ka Account jong ki nongpeit skul. Na kaei ka daw ngim tip. Ngi sngewkhia haduh katta katta ïa kane,” ka la bynrap.
“Balei ki nongshet ja sngi, kim don hok seh ba ka bainong lajong kan poi ha ka Bank Account lajong? Lada ma ngi, ngi ïoh, katba kiwei pat kim ïoh, ka long kaei kaei kaba sngewsih,” ka la ong.
“Ngi kyrpad ïa ki nonghikai bad ïa ki nongpeit ba kin ïatreilang bad ki nongshet ja sngi ha kaba ïadei bad ka jingsiew ïa ka bainong,” la ong shuh shuh ka Kong Syiem.
Ka la khot bad wer ruh ïa ki nongshet ja sngi ha ki skul bapher bapher jong ka Jylla ba kin ïashim bynta lang ha ka jingïakhih lada ka Sorkar kam siew ïa ka bainong kaba ki dei hok ban ïoh.
