Shillong, Jylliew, 09: U Symbud Myntri Rangbah ka Jylla uba khmih ïa ka tnat Kam Pohing, Bah Prestone Tynsong ha ka Lah Sngi u Blei u la byrngem ban khyrwit da kaba tyngeh pyrshah ïa ki lad pathai khubor na rithor bad ïa ki briew kiba donkti ban kynthoh da kaba pynbud nam sniew ïa ka jylla Meghalaya halor ka jingshah pynïap jong u Raja Raghuvanshi ha Sohra.
Ïa ka met ba la lam pyut jong u Raja Raghuvanshi uba wan kai Honeymoon bad ka kurim jong u, ka Sonam, la lap ha ka 2 tarik, mynta u bnai na riat Mot Arliang kaba don hajan ka Wei Sawdong, Sohra, East Khasi Hills hadien ba ma u bad ka kurim ki la jahrngai naduh ka 23 tarik Jymmang, 2025.
Ha ki taiew ba la jia kane ka jingïap jong u Raja Raghuvanshi ki la mih ki jingkynnoh ba laiphew jait da ki lad pathai khubor nabar ka jylla Meghalaya, ïa ki paidbah nongshong shnong ka Meghalaya, ïa ka tnat Pulit bad ïa ka Sorkar Meghalaya.
U Superintendent of Police ka East Khasi Hills Bah Vivek Syiem u la ïathuh ba ki Pulit ki la shimkhia bha ïa kine ki jingshah kynthoh bad shah pynbudnam sniew ha ki lad pathai khubor na rithor bad kumjuh ruh ïa ka jingkynthoh kaba kham shyrkhei shuh shuh da uwei u bar jylla ha ka Social Media kaba buh jingma ïa ka jingim jong ki nongshong shnong ka jylla Meghalaya kiba trei bad kiba pule shabar jylla.
