Shillong, Jymmang, 27: U Bah Lektor Dkhar uba dei u nongshong shnong jong ka Khliehmyntriang, West Jaiñtia Hills District u la byrngem ban ujor sha ka Lokayukta halor ka jingkynnoh ba ka lah ban don ka jingbamsap na ka jingsahteng ban pyntreikam ïa ka skhim Jal Jeevan Mission (JJM) ha ki shnong ka East Jaiñtia Hills District.
“Nga la pyndep pynkhreh ïa ka jingthoh ban dawa tohkit ïa kane ka kam. Wat haba ngi pan jubab da ka RTI ruh kim ai jubab kaba biang. Ngin sa ai shwa kaei ka sienjam ba kin shim bad kaei ka jingpynshai ba kin ai bad hadien kata ngan sa ujor sha u Lokayukta ban dawa tohkit hato ka don neem ka jingbamsap hapoh kane ka skhim,” ong u Bah Lektor Dkhar ha ka jingïakren bad ki lad pathai khubor.
‘Haduh mynta ngam pat lah ban ong eiei hato ka don neem ka jingbamsap tad haduh ba u Lokayukta un da dep tohkit ngin sa ïoh jingtip. Ngin sa ap shwa,” la ong u Bah Dkhar.
“Nga ladep pynkhreh ïa ka jingthoh ban phah sha ka Sorkar Pdeng namarba kane ka skhim (JJM) ka dei jong ka Sorkar Pdeng ka hap ban tip. Ngin sa phah ïa ka jingthoh ban dawa tohkit ïa u Myntri Rangbahduh ka ri u Narendra Modi khnang ba ngin tip shai kaei ka jingshisha bad kaei ka bym shisha,” la ïathuh shuh shuh u Bah Dkhar.
“Ki kwah ban pynjlan ïa kane ka skhim shaduh u snem 2028 katkum ka jingtip jong nga. Ïa kane ngim lah ban pdiang,” u la ong.
U la ïathuh ba ka jingpan RTI ka long halor ka nongrim ba ki paidbah ka East Jaiñtia Hills kim pat ïoh ïa ka skhim JJM.
Katkum ka jubab RTI ba la ai da ka ophis u Executive Engineer PHE, Electrical Division, Khimusniang, Jowai ha ka 23 tarik mynta u bnai, la pyntip ba ki don 5093 ki longiing ba la ïoh ïa ka umkor na ka skhim JJM.
Ka jubab ka pynpaw ruh ba ka jingpynslem ban pynpoi ïa ka umkor lyngba ka skhim JJM ka dei na ka jingwan lynshop ka jingpang khlam Covid-19 kaba la neh ar snem kynthih. Ka jubab ka pynshai ruh ba ka rukom bat khyndew ha Meghalaya ka la long diengpyngkiang ban pyntreikam ïa ka skhim. Baroh ki bynta ba dei ban shna ïa ki bynta jong ka skhim ki dei kiba hap hapoh ki jaka jong ki riewshimet.
Ka jubab ka pynshai ruh ba ki don 3 tylli ki Multi Village Scheme kiba kynthup ïa ki 46 tylli ki shnong na ki lai tylli ki tyllong um. Ka jingbuh ïa ki pipe um ha kine ki Multi Village Scheme ka bam por bha na ka daw ba hap ïakren shwa bad ki trai jaka ha kaba ïadei bad ka Right of Way (RoW) na ka bynta ban pynïaid ïa ki pipe um bad ban shna ïa ki jaka sam um kiba heh.
Ka jubab ka pynshai na ka daw ka jingther jong u lapbah bad ka jingjia ka jingshlei um ha ka lyiur jong u snem 2022-23 bad 2023-24, katto katne ki bynta jong kane ka skhim ba ladep pyntrei ki la shah pynjulor. Kane ka la pynsuki haduh katta katta ïa ka jingtrei.
Ka ophis u Executive Engineer PHE, Electrical Division, Khimusniang, Jowai la pyntip ruh ba ka jingleh test bad pyntrikam ïa ka Rising Main, Gravity Feeder Main bad Sub-Gravity Feeder kiba bun ki jri (Rubber Tyton Joint) ba bteng ïa ki pipe ki la shah bam ha ki ñiang tyrpait bad kane ka la pynlong ba hap ban pyndait bujli ïa ka Rising Main, Gravity Feeder Main bad Sub-Gravity Feeder. Ka por ka la nang bam shuh shuh namarba ki Anchor Block bad ki Supporting Pillar ba la hap ban pynpra biang bad la hap ban bujli da kiwei ki Rubber Tyton Joint bad la hap ban shna thymmai pat sa ïa ki Anchor Block bad ki Supporting Pillar.
Ka jubab RTI ka pyntip ruh ki kontraktor kiba pyntrei ïa kane ka skhim ki don 108 ngut.
Ka Ophis u EE ka la pyntip ruh ba ha East Jaiñtia Hills District ki don 12 tylli ki shnong ba la pyntreikam pura ïa ka skhim JJM, kata 51 iing ha Deiñsatlang, 53 iing ha Umrarong, 542 iing ha Byndihati, 98 iing ha Lahaleiñ, 117 iing ha Nongsning, 69 iing ha Umtyra, 76 iing ha Kairang, 97 iing ha Nongthymme, 48 iing ha Lummyrli, 49 iing ha Lad Wah Wapung, 114 iing ha Dieñchynrum bad 70 iing ha Umlatdoh.
Ka jubab RTI ka la pyntip ruh ba ka pisa ba la mang ban pyntrei ïa ka skhim JJM ha East Jaiñtia Hills ka long 6443.55 lak bad ka jingpynlut ka long 4015.27 lak.
La buh thong ban pynpoi ïa ka um lyngba ka skhim JJM ha East Jaiñtia Hills ka long ha u Nohprah, 2026.
U Bah Lektor u la kam ba ki don ki jubab jong ka RTI kiba ym shai satia.
