Shillong, Naitung, 20: Tang hadien katto katne kynta ka jingbthah jong ka Hynniewtrep Youths Council Seng Kmie lyngba u President Rangbah ka Seng u bah Roy Kupar Synrem ia ki shnat treikam jong ka seng ha kylleng ka Bri U Hynniewtrep ban peit pyrman ia ka rung ka mih jong ki mynder na ka Ri Bangladesh, ha ka sngi Thohdieng mynta ka taiew ki dkhot jong ka ka HYC Ribhoi District ha ka por kumba 7:00 baje janmiet ki lah ioh ban bat haduh 57 ngut ki briew kiba dei ki nong Bangladesh kiba la wan lyngba ka Jylla West Bengal sha kane ka Jylla Meghalaya.
Ia ki video ba la ring hi da ki dkhot ka HYC ba la phah sha ki lad pathai khubor ha ka sngi Saitjaiñ la iathuh ba lap ia kine ki briew ha Lad Umroi kiba shong ha kawei ka Bus kaba don ia u Registration Number WB87-0642.
Haba ki dkhot ka Seng ki pan ia ki kot ki sla bad tohkit ruh ia ka leit ka wan ka jong ki, kine ki briew ki la pyni ia ki Passport bad ki Visa ki jong ki bad ong ruh ba ki thmu ban leit sha Silchar, Assam bad don ruh kiba ong ba ki thmu ban leit sha Shillong bad ban leit shangkai sha Sohra. Hynrei haba kylli pat ia ka jaka ba ki thmu ban shong bad ban sah miet kine ki briew kim shym lah ai satia ia ka jubab kaba shai.
Hadien ka jingbymshai ka jubab na kine ki briew, ki dkhot ka seng ki la aiti noh ia kine ki briew sha ki Pulit jong ka Umiam Police Station khnang ba kin ioh ban tohkit katkum ka aiñ.
Hadien katto katne kynta bad hadien ba la peit ia ki kot ki sla, ki Pulit ki la pyllait noh ia kine ki briew baroh bad la pyntip ruh sha ka seng ba kine ki briew kin leit sha nongbah Silchar, Assam.
Ki dkhot jong ka Seng kiba la buddien ia kine ki briew ki la lap ba ka Bos kaba kit ia ki kam shym lah iaid sha surokbah Bypass ban leit sha Silchar lyngba ka surok Mawryngkneng-Jowai terter hynrei ka la hiar pynban sha ka surok ban leit phai sha Guwahati. Kumta, ki dkhot ki la pynlong ka jingap miet namar kane ka jingleh ka lah pynsuba jur ia ka jingthmu jong kine ki briew.
Ha ka step sngi Saitjaiñ mynta ka taiew, la pyntip da ki paidbah ba kine ki briew ki la wanphai biang sha Lad Umroi bad nangne ki la kiew pat ha ki kali sumo jong ki trai Jylla ban leit sha Sohra.
Shuh shuh ka seng ka la pynlong ia ka jingwad jingtip wut wut bad ioh ruh ia ki Number kali jong ki kali Sumo kiba kit ia kine ki briew sha Sohra ban pynlong ka jingpeit pyrman ia ka iaid ka ieng jong kine ki brew.
Ki Nongialam ka HYC ki la pyntip ruh sha ki bor pulit jong ka East Khasi Hills District bad bad ka Sohra Civil sub-Division ban buddien ia kine ki briew khnang ban pyntikna ba ym dei wat uwei ruh na kine ki 57 ngut ban sah beain ha kane ka Jylla.
“Ngi kyntu ruh ia ka Sorkar ba kan bthah ia ki Infiltration Gate ha kylleng ka Jylla bad ia ki bor Pulit ba kin phikir bha ia ka jingrung jingmih jong ki briew khamtam eh na ka ri Bangladesh ha kum kane ka por bad ka seng ruh kan peit pyrman bha ban ym ailad ba kine ki nong Bangladesh ba kin ioh rung bad shong shnong ha rilum Khasi-Jaintia. Ngi khot bad wer ruh ia ki bor synshar shnong, ki bor synshar Hima ba kin ia long kiba phikir bad tehlakam ia ka jingrung jingmih ki briew kiba nabar ha kum kane ka por,” ong u President ka HYC u Bah Roy Kupar Synrem.
