Shillong, K’ Lyngkot, 08: Ka Hills State Peoples Democratic Party (HSPDP) ha ka sngi Balang ka la pynbna ïa ka thup kyrteng kaba ar jong ki kyrtong ki ban ïakhun ïa ka elekshon sha ka Khasi Hills Autonomous District Council (KHADC) ka ban sa long ha ka 21 tarik Rymphang, 2025.
Ha ka jingïakren bad ki lad pathai khubor, u President jong ka party u Bah KP Pangniang u la pynbna ba ki lai ngut ki kyrtong ki long u nongthoh khubor Bah Starfing Jove Langpen Pdahkasieh u ban ïakhun na Mawsynram Constituency, ka hynmen kynthei jong u MLA ka Mawthadraishan Constituencyu Bah Shakliar Warjri uba long ruh u Myntri Sorkar Jylla ka Kong Kong Phinda Warjri ka ban ïakhun na Pariong Constituency bad u Bah Srally Rashir u ban ïakhun na Mawshynrut Constituency.
Haduh mynta, ka HSPDP ka la pynbna 11 ngut ki kyrtong, arngut ki dei na ki Constituency kiba hap hapoh ka Jaiñtia Hills Autonomous District Council (JHADC).
U la ïathuh ba ka party ka dang pynkhreh ruh ban pynbna sa ïa ka thup kyrteng kaba lai namarba u Bah Martle Mukhim uba mihkhmat kum u MDC ka HSPDP na Mawkynrew Constituency u don mynta hapdeng ka jingbym khlaiñ ka bor met.
U Bah Pangniang u la ïathuh ruh ba ki don katto katne ki Constituency kiba ka party ka la rai ban ym pynieng kyrtong hadien ba la ïapynbeit bad ka paralok RDA, ka United Democratic Party (UDP).
“Ka UDP ruh ka la leh kumjuh bad ha ki katto katne ki Constituency, kam shym la pynieng kyrtong,” u la ong.
U la pyntip ruh ba ka Manifesto jong ka Party ki dei hi kijuh kiba ka party ka pynpaw bad ka jingangnud jong ka party ka long ban pynkhlaiñ shuh shuh ïa ka District Council hapneh jong ka Sixth Schedule kaba dei halor ki lai tylli ki phang pyrkhat jong ka party, kata ban pynneh ïa ka saiñpyrkhat jong ki longshwa, ban ïada ïa ki hok jong ka khyndew ka shyiap ne u pud u sam bad ban pynbha ïa ka synshar ka khadar jong ki shnong bad ki Hima.
Haba kylli, u la ong ba watla ka Party kam shym la lah ban pynieng ïa ki kyrtong ha baroh 29 tylli ki Constituency hynrei ki kyrtong kiba ka la sei mynta ki dei ki kyrtong kiba kynsai bad ka party ka don ruh ïa ka jingkyrmen ba kin jop ha ka elekshon.
