Shillong, Jylliew, 05: Ka Core Committee jong ka United Democratic Party (UDP) ha ka sngi Palei ka la rai ban pdiang ïa ka shithi iehnohkam jong u Dr. Jemino Mawthoh da ka jingbynnud.
Dang shen u Dr Jemino Mawthoh u la phah sha u President ka UDP ïa ka shithi iehnohkam kum u General Secretary bad na baroh ki kam kiba la pynkhamti ha u da ka party.
Ha ka jingïakren bad ki lad pathai khubor hadien ba la wai ka jingïalang u Working President jong ka UDP u Bah Titostarwell Chyne u la pyntip hadien ba la ïatai sani bha ka UDP ka la rai ban pdiang ïa ka shithi iehnohkam watla kum ka party ka bynnud bha ïa ka jingiehnohkam jong u Dr Jemino namarba u dei u briew uba la don lah slem bha ha ka party nalor ba u long uba shemphang bad uba tbit ha ki rukom treikam.
U la ïathuh ba ki don 6 ngut ki Secretary jong ka party bad ïa mynta la bynshet ha uwei na ki Secretary ban shimti shipor kum u General Secretary ïa ki kam jong ka party.
“Ïa kane ka jingiehnohkam jong u Dr. Jemino ngin sa rah ban pyntip sha ka Central Executive Committee ka ban sa long ha ka 27 tarik mynta u bnai,” la ïathuh u Bah Chyne.
Haba kylli, u Bah Chyne u la ïathuh ba u Dr. Jemino u ladep ïakren pamarwei bad u President ka UDP Bah Metbah Lyngdoh bad ïa ki katto katne ngut ki MLA halor ka jingbym lah shuh ban dang kylla dien ïa kaei kaba ladep ban shim rai.
“Katkum ka jingïathuh jong u President kam don hi kano kano ka daw hynrei ka dei beit ka daw shimet jong i (Dr. Jemino) lehse ïoh ka don kawei pat ka bynta kaba kham bha na ka bynta jong i, hynrei ban ong ba kan don ka jingbym ïasngewthuh jingmut ne kano kano ka jingthud ha ka jingïatreikam hapoh ka party kam shym don satia kaba kum kata,” la ïathuh u Bah Chyne.
U la ïathuh ba ka jingïakren hapoh ka Core Committee ka long ban ïashim bynta na ka bynta ka jingpynkhreh ïa ka elekshon MDC ka ban sa long ha Garo Hills Autonomous District Council (GHADC).
“Dang shen u President u la leit ban thaw ïa ka District Committee bad hadien ka jingïalang jong ka CEC ngin sa shong pyrkhat,” u la ïathuh bad bynrap, “ki don ki komiti kiba ka UDP ka ladep pynkha sha rilum Garo khnang ban pyntyllun ïa ki jingtreikam jong ka party.”
