Shillong, Nailar, 17: Ka Seng Samla Catholic Parish Pynthorumkhrah ka la rakhe ïa ka Golden Jubilee ne ka jingdap 50 snem da ka jingpynlong ïa ki prokram bapher bapher ha kine ki sngi.
Kum shibynta na kane ka jinglehkmen, ha ka sngi u Blei ka Seng Samla ka la pynlong ïa ka jingïakob rwai na ka Ktien U Blei ha Peter Hall.
Ïa ka jingrakhe yn sa pynkut ha u bnai Nohprah 2025.
Ha ka jingïakob rwai, ki don 8 kynhun kiba ïashim bynta, kata, 3 tylli na ka Mawpdang Parish, Nongmensong Parish bad Mawpat Parist bad sa san tylli na ki CMC jong ka Parish Pynthorumkhrah ba kynthup ïa ka St. Thomas CMC, Sacred Heart CMC, St. John Paul Mawpun CMC, U Syiem ki Syiem CMC Langkyrding Mihngi bad CMC Syiem ka Jingsuk Langkyrding.
Ka jingïaid lynti jong ka Seng Samla Parish kaba la ïaroh ïa u Don Bosco Bakhuid kum u nongda jong ki samla, ka la long ka jingïaid kaba dap da ki jingeh, jingthrang bad jingjop, kiba pynlong ruh ki soh symbai na ka bynta ki longdien.
Ha ka jingïakop rwai kynhun, ka la long kaba eh ïa ki nongbishar ban ai poiñ namar ka jingtbit jong ki kynhun ba la pynshong nongrim ha ka juk stad bad ka jingkiew jong ka teknoloji. Ha kaba khatduh, St. Thomas CMC Pynthorbah ka la ïoh rah ïa ka nam lahduh, katba ka kynhun rwai na Mawpdang Parish ka jop ïa ka kyrdan kaba ar, bad ka kyrdan kaba lai ka leit sha CMC Sacred Heart Lumshyiap.
Ha ka jingïakop rwai marwei, ka samla Kheiñkor Mylliemngap ka la rah ïa ka nam lahduh, katba ka kyrdan kaba ar ka leit sha samla Olivia Mylliempdah bad kaba lai sha samla Dayonika Shabong.
Ban pynshit rkhem shuh shuh ïa ka jingrakhe jubili, la synran da u Sohblei Laurence L. Nongkseh, Lyngdoh Nongsharai jong ka Pynthorumkhrah Parish, ki dkhot ka Parish Council, ki Seng Kynthei bad Seng Rangbah, ryngkat ruh ki nongïalam ka Shillong Archdiocese Catholic Youth Movement (SACYM) bad ki samla na kylleng.
Ha kaba kut la sam khusnam sha ki nongjop bad la pynkut da ka jingrwai ïa ka Anthem Seng Samla kum ka dak jong ka jingkmen bad jingïaid shaphrang ha kine ki 50 snem.
