Shillong, Lber, 28: U Myntri Rangbah ka Jylla Assam Himanta Biswa Sarma ha ka sngi Thohdieng u la ong ba ka donkam ïa ka Meghalaya bad ka Assam ban ïatreilang ryngkat ryngkat hapoh ka jingkhmih jong ka Sorkar India ban rat dyngkhot ïa ka jingkhaïi drok ha ka thaiñ.
Haba kren sha ki lad pathai khubor, u Sarma u la ong, “phi ïohi ha ka ri jong ngi ïa ka jingïatreilang la ju pynbeit da ka sorkar India. Ki jylla ki ju ïatreilang hapoh ka jingïalam jong ki bor pahara ka Sorkar Pdeng bad ka long kaba bha shibun eh ïa ngi hynrei lada baroh ar tylli ki jylla ki ïatreilang hi khlem ka jingïadon bynta lang jong ka Sorkar Pdeng kata ka lah ban ym long kaba dei. Kumta, ka jingthmu ka long ba ka Meghalaya bad ka Assam ki lah ban ïatrei lang hapoh ka jingkhmih jong ka Sorkar India.”
Da kaba pynpaw ba baroh ki Sorkar Jylla ki pyrshang katba lah ban ïakhun ïa kane ka jingeh, u Myntri Rangbah ka jylla Assam u la ong, “kane ka dei ka jingma kaba khraw bad ki don ki buit treikam bapher bapher na ka bynta ki nongkhaïi drok bad nga ngeit ba lada ngi ïai bteng ban hiar thma lang ïa ki nongkhaïi drok ngin sa jop ïa ka thma. Manla ka jylla ka trei la ka kam bad nga ngeit ba ngi don bun ki kam ban leh.”
Ha kaba ïadei bad ka jingbym ïohkem ïa ki Kingpin kiba ju pynïaid ïa ka kam khaïi drok, u Sarma u la ong, “ki Kingpin kim don hangne. Ki Kingpin ki don sha shiliang pud. Ki lah ban don ha India ruh khnang ba kin dup lah ban pynïaid iew ïa u drok lyngba ki dalal bad teng teng ki wanrah bun u mar bad teng teng ki wanrah khyndiat, dei na kata ka daw phim lah satia ban lap.”
“Lada shiphew ngut ki briew ki ïa leit jingleit lang ha ka rel sha Delhi bad lada uwei uwei u rah mar shi teng u drok herion ha ka pla ka long kaba eh ban lap. Namarkata, ki don la ki jong ki buit treikam, ha kaba ki lah ban shu ïaid da ka kjat ruh. Lada u briew u ïaid na Guwahati sha Shillong bad u rah ïa u drok ha ka pla, ka long kaba eh ban lap. Kine ki dei ki buit treikam jong ki bad ki Pulit ruh ki kham stad ban ïa ki bad kata ka dei ka lynti kumno ngi thwet ïa ki nongkhaïi drok,” la ong u Sarma.
Shuh shuh u Myntri Rangbah ka Assam u la ong ba ka ain NDPS Act kam dei ka jingkhanglad.
“Kumba phi tip wat ha ki jylla jong ka ri America, mynta ki la pyrshang ban khanglada ïa ki nongkhaïi drok. Kam dei tang ha Meghalaya bad ha Assam ba ngi ïakhun hynrei ka pyrthei baroh kawei ruh ka ïakhun pyrshah ïa ki nongkhaïi drok bad ka dei ka kam khaïi kaba heh bad ki don bun ki tyngshop barieh ha ka. Na kata ka daw, ka dei ka kam kaba h eh bad kam dei tangba phin shu leit sha ka jaka bad ba phin khynra kata ka la kut noh. Kane ka dei ka thma kaba jrong bad phin hap ban bteng ïa kane ka thma,” u la ong bad bynrap, “phi ïohi nga ngeit ba ha ka jylla Assam bad Meghalaya ki dang don ki nongkhaïi drok kiba dang pyndonkam ïa ka lynti ïaid bad da kiwei ruh ki buit da kaba pynhap ïa u drok lyngba ki drone, wat lada phim lah ban tip thikna ïa ka Golden Triangle, kin pynher beit da ki drone sha kano kano ka jaka. Ka dei ka kam kaba ïar bad kam dei satïa tang ka jingïakren hapdeng jong nga bad phi ba lah ban pynkut ïa ka jingeh hynrei ka donkam ïa ka jingïatreilang.”
“Nga ngeit ba kane ka dei ka thma kaba jrong hynrei phi hap ban long kiba ïaishah, phin hap ban ïai bteng ban hiar thma kawei hadien kawei bad phin hap ban ïai kem ïa ki (nongkhaïi), kurup ïa u drok khnang ban pyntroiñ ïa ka jingkhaïi drok,” la bynrap shuh shuh u Sarma.
