Shillong, Naitung 23: U Chief Executive Member (CEM) ka Khasi Hills Autonomous District Council (KHADC) u Bah Shemborlang Rynjah ha ka sngi Balang u la leit ban jurip ïa ka khlaw Mawpat bad u la pynbna ba ka executive committee (EC) jong u shen kan sa ïakynduh ban tohkit halor ka jingkynnoh ba la thied jaka beaiñ bad kumjuh ruh ban shim ki rai bad ki kam kiba kongsan ban ïada ïa kane ka khlaw.
Ïa u Bah Rynjah la synran lang da ki executive member (EM) bad ki ophisar na ki lai tylli ki tnat, ba kynthup ka elaka, land bad forest, ha kane ka jingleit jurip kaba la leh hadien ka jingïoh jingujor na ka women bad youth wing jong ka seng Voice of the People Party (VPP).
Katkum ka jingïathuh u chief executive member (CEM), ïa ka khlaw Mawpat la pynbna kum ka ‘Law Adong’ ha u snem 2014.
Haba ïakren bad ki lad pathai khubor u Bah Rynjah u la ïathuh ba u la sakhi ïa ka jingdon bun ki mawpud kiba la pynïeng bad sieh hapoh kane ka khlaw. U la kubur ruh ba ki don ki jingïathuh kiba kdew ba don katto katne ngut ki MLA kiba la ïoh ïa ki jaka ha kane ka khlaw.
“Hynrei halor kane ngi dang sah ha ka umdum naba kine ki mawpud ki dei ki jongno bad mano ba la pynïeng bad sieh ïa ki. Kumta ka EC ka la rai ba shen kan sa ïa kynduh ban tohkit halor kane ka jingïoh thied jaka beaiñ hapoh kane ka khlaw bad kan sa shim ka rai bad ki kam kiba donkam halor kane ka jinglap,” ïathuh u CEM.
“Kumba ka long mynta, ngam tip la kine ki briew, kiba la sieh ïa ki mawpud, ki la ïoh jingbit lyngba ki rukom pynïaid kam kiba dei ne em bad la ki dei ne em ki khun ki hajar jong ka Hima Mylliem, naba ngi tieng ïoh don kiwei pat ki briew kiba dei shabar jong ka Hima, kiba la ïoh ïa kine ki jaka hangne,” u la ong da kaba banjur ïa ka jingdonkam ban bud ïa ki kyndon jong ka jingïasoi jingmynjur kaba la leh ha ka 22 tarik u Jymmang, 2014.
U Bah Rynjah u la pynpaw ka jingngeit ba ka rai ba la shim da u CEM barim u Bah Ardent Miller Basaiawmoit ban pynbna ïa kane ka khlaw kum ka ‘Law Adong’ ka long halor ka nongrim ban khmih ïa ki kam ki jam ha kane ka thaiñ. U la pyntip ruh ba hadien ba la bishar bniah ïa ki kot ki sla jong kane ka khlaw, ka la pynpaw ba kane ka thaiñ ha ki khana pateng mynshwa la tip kum ka “Khlaw Sumar Kyrpang”.
Hynrei ha kawei ka liang, u la kdew pat ba ka KHADC ka la pyndam noh ïa kane ka jingpynbna kaba la leh ha ka snem 2019 bad ba la aiti noh ïa kane ka khlaw sha ka Hima Mylliem. “Namar kata ka EC kan sa ïakynduh mardor ban rai halor ka kyrdan jong kane ka khlaw,” bynrap u Bah Rynjah.
La ïathuh ba kane ka jingïakynduh ka EC kan long halor ka jingthmu ban shim ka rai halor ki kam ba ïadei bad ka kyrdan jong kane ka khlaw.
U Bah Rynjah u la banjur ruh da kaba ïathuh ba ka council ka dang ïai ap ïa ka kaiphod ban tip mano ba la sieh ïa kine ki mawpud jaka ha kane ka khlaw bad ka ap ban ïoh ka jingtip kaba bniah ha shwa ban shim ïa ka rai.
U la pynshai ruh ïa ka jingbym khot ka KHADC ïa ka Hima Mylliem ban pynlong ka jingïajurip lang, hynrei kaei kaba mih na ka jingïalang ka EC kan sa lah ban pynpaw shuh shuh ki jingshai halor kane ka kam.
