Shillong, Jymmang, 05: Da ka jingshimkhia jong ka Sorkar Jylla, ki bor pynïaid jong ka NEIGRIHMS ki la rai ban pynsangeh shwa ïa ka jingthungkam Nurse hadien ba ka Khasi Students Union (KSU) ka la dawa ba dei ban pynbeit shwa ïa ki kynrum kynram ha kaba ïadei bad ka jingthungkam hapoh kane ka Hospital kaba pynïaid da ka tnat ka Koit ka Khiah jong ka Sorkar Pdeng.
Ka Sorkar Jylla ka la shim ïa kane ka sienjam hadien ba ka Khasi Students Union (KSU) ka la pynlong da ka jingïakhih kaba la kynjoh mynta sha ka sngi kaba saw da kaba shong kyllaiñ myngngor ha Administrative Block jong ka NEIGRIHMS.
Ha ka jingïakren bad ki lad pathai khubor ha ka Lah Sngi u Blei hadien ba la wai ka jingïalang ba la pynïaid da u Myntri ka Sorkar Jylla u Bah Paul Lyngdoh ryngkat ka jingdonlang jong u Director ka NEIGRIHMS u Dr. Nalin Mehta bad ki heh Ophisar jong ka Sorkar Jylla lem bad ki nongïalam jong ka Khasi Students Union (KSU) u Bah Paul Lyngdoh u la ïathuh ba ka jingïalang ka la rai ban sa leit ïakynduh ïa u Myntri ka Sorkar Pdeng uba khmih ïa ka Ministry of Health and Family Welfare ban pynsngew ïa ki mat ba la rai da ka Governing Council jong ka NEIGRIHMS halor ka thungkam thungjam.
Nalor kata, ha kaba ïadei bad ka jingpynbeit ïa ka Roster System ka ka jingïalang ka la shim ïa ka rai ba ki nongïalam jong ka KSU kin shong ïathir ïatai lang bad ki ophisar jong ka NEIGRIHMS ban khmih bniah kumno ban pyntreikam ïa ka Rosters bad na ka liang jong ka Sorkar ka la kyrpad ruh ïa ka KSU ban weng noh ïa ka jingïakhih hadien ka jingshim ïa kine ki rai ha kane ka jingïalang.
Na ka liang jong ka KSU ka la rai ban weng noh ïa ka jingïakhih hadien kane ka jingshim rai da ka Sorkar Jylla bad ki bor pynïaid jong ka NEIGRIHMS.
