Shillong, Risaw 22 : Ka Don Bosco youth center, Shillong kawei na ki shlem ba ai jinghikai ha ki training bapher bapher na ka bynta ki samla khnang ba kin lah ban ieng ha la ki jong ki kjat, bad ban ioh jingmyntoi ruh ha ka jingim jong ki, mynta ka sngi 22 tarik Risaw 2025, na ka liang u director jong ka Donbosco youth center, Father Michel Makri u la ai da ka kor suhjain ia ka samla Sinora Khongshei kaba la pyndep ia ka training jong ka ha ka jingsuh jain.
Kane ka jaka ai jinghikai ka ju kyrshan bad ai sngewbha na ka por sha ka por khamtam ia ki khynnah kiba pass bha kiba la pyndep ia ki training bapher bapher da ki computer, ki laptop, ki kor suhjain bad kiwei kiwei de khnang ba kin lah ban ieng ha la ki jong ki kjat bad ba kin lah ban seng ia la ki kam ki jam.
Haba kren ha katei ka prokram, u Director u la iathuh ba katkum ka jingbishar jong ka nonghikai kaba ai training, la ibit ia kane ka samla ba kan ioh ia kane ka kor suhjain kum ka dak ban ai mynsiem ia ka bad ia kiwei pat ki khynnah samla khnang ba kin lah ban ieng ha la ki jong ki kjat. Ka samla Sinora Khongshei ka la ai khublei ia ka Donbosco youth centre bad ia ka nonghikai, bad ka la kyntu ia ki para ba pule lang ban trei shitom bad ban minot.
