Shillong, Nailar 24: Ka All India Trinamool Congress (AITMC) ka la rai ban pynïeng da ka kurim jong u Zenith Sangma ka Sadhiarani M. Sangma kaba dei ruh ka MDC ba marwei ha Garo Hills Autonomous District Council (GHADC) kum ka kyrtong ha kane ka election shiteng samoi ka ban sa long ha Gambegre.
Ha ka jingiakren bad ki lad pathai khubor u Dr. Mukul Sangma u la ïathuh ba u President jong ka Trinamool Pradesh Congress Committee u Bah Charles Pyngrope bad kiwei pat ki dkhot jong ka Election Committee ki la ïasyllok ban khmih ïa ka aplikeshon jong ka kyrtong.
“Ka Committee da kawei ka sur ka la shim ïa ka rai ban mynjur ïa ka kyrteng jong ka Sadhiarani na ka bynta ban ïoh ka jingpynskhem kaba khatduh ba kan long kum ka kyrtong jong ka TMC ha ka elekshon shiteng samoi napoh Gambegre. Kumta ngin ap ïa ka jingpynskhem jong ka Chairperson bad shen yn sa pynbna ïa ka kyrteng shisien ba la mynjur da ka Chairperson,” la ong u Dr.Mukul ba dbynrap ba ka TMC ka la ïaid shakhmat sha ki shnong ki thaw bad ki dkhot ka seng ki la trei shitom ba ka party kan ïoh ka jingjop napoh Gambegre seat.
Ïa kane ka election shiteng samoi yn sa pynlong hadien ka jingiehnoh kam jong u MLA ka Congress u Saleng A Sangma hadien ba u la shah jied kum u MP ba thymmai ka Tura Parliamentary Seat.
